Skip to content
Португалскиот град Порто е прогласен за најљубезниот град во Европа за 2026 година, според изборот на читателите на туристичкиот магазин Condé Nast Traveller. Со 98,33 од можни 100 поени, Порто го освои првото место, пред Лисабон и Амстердам, потврдувајќи ја репутацијата на Португалија како една од најгостопримливите европски земји.
Рангирањето е дел од годишните награди Readers’ Choice Awards 2026, во кои читателите ги оценуваат туристичките дестинации врз основа на своите искуства. Главен критериум во оваа категорија е гостопримството, односно односот на локалните жители кон посетителите, нивната љубезност и подготвеност да им помогнат.
Порто, вториот по големина град во Португалија, се издвојува по непосредната атмосфера, традиционалната архитектура и локалната гастрономија. Сместен покрај реката Дуро, градот е познат по шарените фасади, тесните калдрмисани улици и историското јадро кое се наоѓа на листата на светското наследство на УНЕСКО.
Според Condé Nast Traveller, токму автентичноста на Порто и опуштениот начин на живот придонесуваат градот да биде особено привлечен за туристите. Посетителите имаат можност да ја запознаат локалната култура преку традиционалните ресторани, малите плоштади украсени со португалски керамички плочки и секојдневните средби со жителите.
Магазинот го издвојува гостопримството како една од главните причини поради кои туристите повторно го посетуваат Порто. Градот во последните години бележи зголемена популарност како дестинација за кратки патувања, особено меѓу љубителите на гастрономијата и културниот туризам.
На второто место се најде Лисабон со 97,60 поени. Португалската престолнина е позната по своите седум ридови, традиционалната фадо музика, карактеристичните трамваи и богатата култура на кафулиња.
Според оценките на читателите, Лисабон се издвојува по отвореноста на жителите и можностите посетителите да се вклучат во секојдневниот градски живот.
Третото место му припадна на Амстердам со 97,50 поени, додека Стокхолм е четврти со 96,67 поени. Петтото место го освои Валета, главниот град на Малта, со 95 поени.
Меѓу 15-те најљубезни градови во Европа се најдоа и Единбург, Виена, Краков, Палма, Гранада, Џенова, Корк, Париз, Рим и Рејкјавик.
Порто постигна значаен резултат и на светската листа на најљубезни градови за 2026 година, каде што го освои второто место, веднаш зад австралискиот Мелбурн, кој е прв со 98,52 поени.
Годишното рангирање на Condé Nast Traveller се темели на оценките на читателите, а резултатите за 2026 година беа објавени на 6 октомври. Тие го одразуваат задоволството на патниците од посетените дестинации, а не претставуваат официјално мерење на гостопримството на населението.
