Skip to content
Американската компанија за вештачка интелигенција Антропик ќе одвои пет отсто од своите акции во посебен фонд за финансирање проекти од јавен интерес, во период кога се подготвува за берзанско деби со потенцијална пазарна вредност поголема од еден трилион долари.
Фондот за јавна корист на производителот на моделот Клод ќе поддржува непрофитни организации и иницијативи насочени кон справување со последиците од вештачката интелигенција врз пазарот на труд. Од компанијата соопштија дека одборот на директори има дискреционо право подоцна да додаде уште два отсто од акциите. Според официјалниот став, овие средства нема да се користат за политичко лобирање ниту за донации во САД или во странство.
Одлуката доаѓа во момент кога технолошкиот сектор се соочува со засилен надзор поради безбедносни ризици и стравувања од масовно губење работни места. Во документацијата за првичната јавна понуда, Антропик посочи дека вештачката интелигенција може да предизвика катастрофални или егзистенцијални ризици за човештвото.
Компанијата минатата недела ги информираше потенцијалните инвеститори дека приходите за тримесечјето до крајот на септември пораснале за 45 отсто, достигнувајќи 16,8 милијарди долари. Како и останатите лидери во индустријата, Антропик настојува да докаже профитабилност наспроти огромните трошоци за изградба на инфраструктура и развој на напредни модели.
Најавата предизвика реакција кај конкуренцијата. Илон Маск на социјалните мрежи порача дека акциите треба директно да му се доделат на народот, најавувајќи дека самиот ќе примени таков пристап.
Истовремено, загриженоста за брзината на технолошкиот напредок расте и внатре во самата индустрија. Поранешниот истражувач во Антропик, Џејкоб Коксон, изјави за Би-би-си дека инженерите се сериозно исплашени од темпото на развој и повика на итно забавување на процесите. Челникот на Антропик, Дарио Амодеи, заедно со првите луѓе на ОпенАИ и ИксАИ, Сем Алтман и Илон Маск, претходно изразија поддршка за воведување независен мониторинг и заедничко забавување на развојот на моделите.
Претседателот на САД, Доналд Трамп, неодамна потпиша морално обврзувачки договор со раководителите на водечките технолошки корпорации, со кој одговорноста за безбедноста им се препушта на самите компании. Трамп одбива законска регулација на секторот, а за координатор на новата работна група за вештачка интелигенција го именуваше директорот на националното разузнавање Џеј Клејтон.
