Skip to content
Кина за првпат регистрира поголем број лица постари од 65 години отколку деца, што ги потврдува размерите на длабоката демографска криза и засиленото стареење на населението во земјата.
Според податоците на кинескиот Национален завод за статистика, во земјата живеат повеќе од 223 милиони граѓани на возраст од 65 години и повеќе, додека бројот на деца до 14 години изнесува околу 213 милиони.
Официјалната статистика покажува дека соодносот на возрасното население во однос на работоспособното достигна 23,1 отсто во 2025 година, наспроти 22 отсто колку што изнесува соодносот за децата. Овој показател бележи постојан раст во изминатите десет години, откако во 2016 година изнесуваше 15 отсто, а во 2021 година надмина 20 проценти.
Вкупниот број на жители во Кина се намалува веќе четири последователни години, паралелно со падот на стапката на наталитет на рекордно ниско ниво.
Демографскиот пад трае со децении, а експертите како клучни фактори ги наведуваат долгогодишната политика на едно дете, спроведувана од 1980 до 2015 година, како и брзата урбанизација и трошоците за живот.
Власта во Пекинг воведува низа мерки за поттикнување бракови и зголемување на раѓањата, вклучувајќи финансиска поддршка за семејствата, помош при грижата за децата и намалување на трошоците за породување и здравствена заштита, со фокус на создавање подобри услови за живот во градовите.
