Skip to content
Бел тартуф со тежина од 850 грама беше продаден вчера на аукција во Италија за неверојатни 100.000 евра, објави денес италијанската новинска агенција Анса.
Тартуфот го купил купувач од Хонг Конг на меѓународна аукција во Алба, град во италијанскиот регион Пиемонт. Станува збор за една од најпрестижните аукции на тартуфи во светот.
На истата аукција беше продаден и тартуф од 300 грама, за кој локален бизнисмен плати 14.000 евра. Овогодишната 27-ма аукција привлече купувачи од целиот свет, вклучувајќи ги Хонг Конг, Виена, Бангкок, Лондон, Бразилија и Макао.
„Сезоната очигледно се подобрува“
Вкупната вредност на продадените тартуфи оваа година достигна 545.800 евра, што е втор највисок износ во историјата на оваа аукција, според Анса.
„Оваа година, тартуфите претрпеа одредени штети поради сушата. Но, благодарение на неодамнешните дождови, сезоната сега очигледно се подобрува и се надеваме дека остатокот од годината ќе биде подобар“, изјави за АФП Роберто Бодрито, регионален претседател на здружението што ја организира аукцијата.
Белите тартуфи често се нарекуваат „бело злато“ поради нивната голема вредност во кулинарската уметност. За разлика од црните тартуфи, белите тартуфи не можат да се одгледуваат. Тие растат исклучиво во природата, под земја, прицврстени за корените на одредени видови дрвја.
