Естонија од 1 декември ги затвора сите патни гранични премини со Русија од безбедносни причини, соопшти естонската влада. По истекот на шест месеци, Талин ќе одлучи дали мерката ќе биде продолжена, додека Москва ги отфрла обвинувањата за саботажи.
Естонската влада донесе одлука да го запре патниот сообраќај на границата со Русија почнувајќи од 1 декември. Суспензијата ќе важи најмалку шест месеци, по што властите повторно ќе ја проценат безбедносната состојба и ќе одлучат за евентуално продолжување на мерката.
Одлуката следува откако Естонија во неделата ги обвини руските безбедносни служби за организирање обид за подметнување пожар во естонска одбранбена компанија. Според Талин, ова е втор ваков инцидент регистриран во земјата од почетокот на годината.
„Затворањето на граничните премини не е реакција на еден поединечен инцидент, туку следен чекор по руската агресија врз Украина и сè почестите саботажи и хибридни операции во Европа“, изјави министерот за надворешни работи на Естонија, Маргус Цахкна.
Портпаролот на Кремљ, Дмитриј Песков, во понеделникот ги негираше естонските обвинувања. Тој оцени дека тврдењата се дел од низата лажни обвинувања против Москва кои доаѓаат од европските држави. Руската амбасада во Талин не одговори веднаш на барањето за дополнителен коментар.
Естонија, која е членка на НАТО и на Европската Унија, има пет патни премини преку кои патниците можат да влезат или да излезат од Русија. Со овој потег, Талин го следи примерот на својот северен сосед Финска, која ги затвори сите гранични премини со Русија во 2023 година и оттогаш ги држи затворени. За разлика од нив, јужните балтички држави Летонија и Литванија сè уште одржуваат отворени премини кон руска територија.
Според податоците на естонската полиција, од почетокот на годината границата меѓу Естонија и Русија ја преминале вкупно 760.000 лица. Од нив, 307.000 биле руски државјани, 175.000 естонски државјани, а 54.000 патници имале фински пасоши.
Илјадници жители на Естонија имаат семејни врски во Русија како наследство од советскиот период. Граничниот премин кај Нарва, град на естонската страна каде мнозинството население зборува руски јазик, досега го користеа и патници од други европски земји како најбрза рута за пристигнување до Санкт Петербург.

