Skip to content
Шефот на израелската дипломатија Ели Коен денеска го повика генералниот секретар на ОН, Антонио Гутереш, да поднесе оставка, бидејќи, како што наведе, „не унапредил никаков мировен процес на Блискиот Исток“.
Коен барањето го исложи за време на посетата на канцелариите на ОН во Женева, како и за време на состаноците со Меѓународниот комитет на Црвениот крст и Светската здравствена организација (СЗО), пишува „Тајмс оф Израел“.
-Генералниот секретар на ОН, Антонио Гутереш, не заслужува да ги води ОН. Тој не промовираше никаков мировен процес во регионот. Гутереш, како и сите слободни нации, треба јасно и гласно да каже: „Ослободете ја Газа од Хамас“, рече Коен на прес-конференција во Женева.
Коментарите на Коен уследија откако Гутереш претходно остро го критикуваше Израел, велејќи, меѓудругото, дека иако нема оправдување за злосторствата извршени од Хамас, „тие не се случија во вакуум“.
За време на состанокот со претседателката на Меѓународниот Црвен крст, Мирјана Шпољариќ Егер, Коен побарал Црвениот крст „да работи преку сите канали“ за да обезбеди посети на заложниците што ги чува Хамас во Газа.
-Очекуваме Црвениот крст да го стави ова прашање на врвот на приоритетите на организацијата, да ги искористи сите лостови на притисок и да не стои во место додека не ги посети сите заложници, не ја процени нивната состојба и не се увери дека ќе бидат обезбедени соодветна медицинска нега, рече шефот на израелската дипломатија.
На состанокот присуствуваше и израелскиот министер за здравство Уриел Бусо, како и неколку членови на семејствата на заложниците кои ги држеше Хамас.
