Државниот пазарен инспекторат (ДПИ) деновиве упати предупредување до македонските граѓани да внимаваат при купувањето на пелети за огрев, поради можноста на пазарот да им бидат понудени производи кои не одговараат на декларираните стандарди за квалитет.
Според Горан Трајковски, директор на ДПИ, пазарната инспекција во последниот период открила пелети кои се продавале како висококвалитетни словенечки производи, но во реалноста не потекнуваат од Словенија и не ги исполнуваат барањата за квалитет.
Директорот Трајковски информираше дека инспекциските контроли откриле значителни злоупотреби на пазарот, каде пелети се декларираат како „А1 класа“, што е стандард за највисок квалитет на пелети за домашна употреба.
Во некои случаи, сепак, овие пелети се со значително понизок квалитет и се наменети за индустриска употреба, како што се „А2“ или „Б“ класа.
„Пронајдени се пелети декларирани како словенечки, а немаат врска со Словенија. Пакувани се во други држави, а не соодветствува и квалитетот. Граѓаните мора да знаат кога купуваат каде се пелетите произведени и како се пакувани. Дури тогаш да одлучат да купат зашто во моментов имаме декларирање А1 класа, која може да е А2 или Б, за индустриска употреба“, истакна Трајковски.
Печката на пелети троши од 10 до 15 килограми пелети дневно. Пелетите за време на енергетската криза скокнаа на над 600 денари, но сега може да се најдат и за 190 до 230 денари од вреќа која тежи 15 килограми и тоа со се достава.
Пелетите имаат убедливо најмала емисиона вредност во однос на јагленот, нафтата и огревното дрво и согласно истражувањата греењето со пелети загадува 20 пати помалку отколку со дрва. Употребата на пелети за огрев, во домаќинствата и деловните објекти во земјите од Европската унија од година во година расте. Пелетите треба да се составени од чисто дрво, без лепила, лакови или други хемикалии. Тие треба да имаат одредена големина, облик и густина, за да можат да се запалат и да горат еднакво. Ако пелетите не ги исполнуваат овие критериуми, тие можат да предизвикаат чад, мирис и други штетни емисии, кои негативно влијаат врз здравјето на луѓето и животната средина, велат експертите.
Со субвенциите кои ги даваше Град Скопје и повеќе општини во земјава за купување на печки на пелети, одреден процент на граѓани се преориентираа затоплувањето на станбениот простор да го вршат со овој енергенс. Печката на пелети троши од 10 до 15 килограми пелети дневно. Пелетите за време на енергетската криза скокнаа на над 600 денари, но сега може да се најдат и за 190 до 230 денари од вреќа која тежи 15 килограми и тоа со се достава. ДДВ то за пелетите изнесува 5 отсто.
