Skip to content
Хејден Панетиер беше една од оние холивудски ѕвезди кои јавноста ги гледаше како растат пред камерите, од детска актерка до глобално препознатливо лице од сериите „Heroes“ и „Nashville“. Но зад успехот, црвените теписи и номинациите за Златен глобус, Панетиер со години водеше тешка битка со зависноста, постпородилната депресија, семејните загуби и притисокот од животот во Холивуд. Американската актерка почина на 16 август на 36 години, а причината за смртта сè уште не е официјално соопштена.
Панетиер почнала да работи пред камера уште како дете. Првите улоги ги добила во телевизиски сапуници, а подоцна играла во филмови како „Remember the Titans“ и позајмувала глас во анимирани продукции.
Вистинскиот пробив дојде со серијата „Heroes“, во која ја играше Клер Бенет, тинејџерка со натприродна способност да преживее повреди. Улогата ја направи меѓународно позната уште додека беше тинејџерка. Подоцна следуваше Џулиет Барнс во „Nashville“, лик кој ѝ донесе две номинации за Златен глобус и дополнително ја зацврсти нејзината кариера.
Но токму во годините на најголемата слава приватниот живот почнал да станува сè потежок.
Во мемоарите „This Is Me: A Reckoning“, објавени во мај годинава, Панетиер отворено пишуваше за зависноста од алкохол и други супстанции, депресијата и притисоците со кои се соочувала уште од најраните години во индустријата. Во едно од своите последни интервјуа зборуваше и за темната страна на детската слава и за чувството дека голем дел од нејзиниот живот бил обликуван од луѓе околу неа уште пред самата да може да носи зрели одлуки.
Нејзината зависност во еден период станала толку сериозна што лекар ја предупредил дека, доколку продолжи да пие со истото темпо, може да не преживее уште пет години. Панетиер подоцна поминала осум месеци на лекување и јавно зборувала за физичкиот и психичкиот процес на одвикнување.
Дополнителен пресврт во нејзиниот живот било раѓањето на ќерката Каја во 2014 година, која ја доби со поранешниот украински боксерски шампион Владимир Кличко.
Панетиер отворено зборуваше за тешката постпородилна депресија и за периодот кога не можела да функционира како што очекувала од себе како мајка. Во 2018 година донела тешка одлука ќерката да живее со Кличко во Европа додека таа се лекувала и се обидувала да го стабилизира својот живот. Подоцна категорично ги отфрлаше тврдењата дека ја напуштила својата ќерка и велеше дека одлуката била донесена за доброто на детето.
Во своите последни јавни настапи зборуваше и за болката што ја чувствувала затоа што голем дел од односот со Каја го одржувала преку видеоповици и патувања. Истовремено нагласувала дека нивната емотивна врска останала силна и дека сакала ќерка ѝ никогаш да не помисли дека е одговорна за проблемите низ кои минувала нејзината мајка.
Во 2023 година Панетиер доживеа уште една голема лична трагедија, кога почина нејзиниот помлад брат Јансен, на 28 години. Таа подоцна зборуваше дека неговата смрт длабоко ја погодила и повторно ја турнала во тежок период на тага и изолација.
И покрај сето тоа, во последните години повторно почнала да се враќа во јавноста и во актерството.
Се појави повторно како Кирби Рид во франшизата „Scream“, а нејзина последна филмска улога беше во психолошкиот трилер „Sleepwalker“. Во 2026 година, со објавувањето на мемоарите, Панетиер започна и ново поглавје во кое сè поотворено зборуваше за зависноста, менталното здравје и искуствата што со години ги чувала далеку од јавноста.
Само неколку месеци пред смртта, таа зборуваше за плановите што ги има за иднината. Сакала да продолжи да работи, да создаде сопствена продукциска компанија и да им отвора простор на нови таленти. Нејзините мемоари стигнаа и на листата на најпродавани книги на „Њујорк тајмс“.
Семејството ја потврди нејзината смрт на 16 август. Панетиер почина само неколку дена пред својот 37 роденден. Надлежните органи ја истражуваат причината за смртта, а официјална причина досега не е објавена.
