Ова се најплатените тениски ѕвезди, а еве и на кое место е легендарниот Новак Ѓоковиќ

Најплатените тениски ѕвезди во светот заработиле вкупно 333 милиони долари во последните 12 месеци, а легендарниот Новак Ѓоковиќ го зазеде шестото место на годишната листа на „Форбс“. Српскиот тенисер инкасирал проценети 30,2 милиони долари, но најголемиот дел од сумата не дошол од турнирските терени.

На врвот на листата е Јаник Синер со 58 милиони долари, од кои рекордни 23 милиони ги заработил на теренот. Веднаш зад него е Карлос Алкараз со 53,7 милиони долари, додека третото место го зазеде повратничката Серена Вилијамс со 40,1 милион долари.

Пред Ѓоковиќ се најдоа и Арина Сабаленка, која заработила 36,1 милион долари, и Коко Гоф со 35,5 милиони. Зад српскиот тенисер се Ќинвен Женг, Ига Швјонтек, Александер Зверев и Елена Рибакина.

Според целосната анализа на „Форбс“, Ѓоковиќ во последната година заработил 5,2 милиони долари од награди и бонуси на теренот, додека дури 25 милиони долари дошле од спонзорски договори, настапи и други деловни активности.

Таквиот сооднос покажува дека 39-годишниот Ѓоковиќ и натаму е еден од комерцијално највредните спортисти во светот. Неговото портфолио вклучува договори со „Ибло“, „Лакост“, „Катар ервејс“, „Асикс“ и други компании, а во јуни ѝ се приклучи на инвестициската компанија „Џенерал атлантик“ како глобален стратешки советник.

Иако нема освоено гренслем-титула по Отвореното првенство на САД во 2023 година, Ѓоковиќ годинава стигна до финалето на Отвореното првенство на Австралија и до полуфиналето на Вимблдон. Неговата вкупна заработка од турнирски награди во кариерата изнесува околу 195 милиони долари, што е највисока сума во историјата на тенисот.

Титула на годинашното Отворено првенство на САД би му донела уште 5,5 милиони долари и би го направила првиот тенисер што ја надминал границата од 200 милиони долари заработени исклучиво од турнирски награди.

Годинашната листа носи и историски пресврт: првпат во нејзиното 19-годишно постоење меѓу десетте најплатени има повеќе жени отколку мажи – шест тенисерки и четворица тенисери. Заедничката заработка од 333 милиони долари е за 17 проценти поголема во споредба со претходната година.