Skip to content
Американската компанија „Тесла“ ја претстави новата генерација на електричниот спортски автомобил „Роудстер“, опремен со специјални потисници што му овозможуваат да се одвои од земјата и да изведува воздушни маневри. На презентацијата во Тексас, автомобилот се движеше превртен, изведе акробатски маневар во воздух и контролирано слета, демонстрирајќи технологија развиена во соработка со „Спејс Икс“.
Премиерата се одржа во објектот за тестирање ракети на „Спејс Икс“ во Мекгрегор, речиси девет години по првото претставување на концептот за втората генерација на „Роудстер“.
Извршниот директор на „Тесла“, Илон Маск, го претстави автомобилот како спој на автомобилската и вселенската технологија, најавувајќи перформанси што треба да ги надминат можностите на постојните сериски спортски автомобили.
Најголемото внимание го привлече демонстрацијата на специјалната верзија „Роудстер Рокет“, опремена со потисници што користат компримиран гас. Овој систем овозможува краткотрајно подигнување на автомобилот од подлогата, воздушни ротации и контролирано слетување.
Дополнително, „Роудстер“ користи систем од вентилатори под каросеријата кои создаваат силен потпритисок и го прилепуваат автомобилот за површината. За време на презентацијата беше прикажано дека системот може да го задржи возилото дури и во превртена положба.
Новата генерација ќе биде понудена во три верзии. Основната „Performance“ е наменета за патна употреба, „Thrust“ ќе биде ориентирана кон екстремни перформанси, додека најмоќната „Rocket“ ќе располага со целосен систем за краткотрајни воздушни маневри.
Според информациите претставени на премиерата, новиот „Роудстер“ ќе може да забрза од нула до приближно 100 километри на час за помалку од една секунда, а максималната брзина треба да надмине 370 километри на час.
Од компанијата најавуваат и автономија од над 480 километри со едно полнење. Сепак, овие карактеристики допрва треба да бидат потврдени кај сериски произведен автомобил.
Надворешниот дизајн се одликува со ниска каросерија, тесни ЛЕД-светла и активни аеродинамички елементи. Во внатрешноста се предвидени две седишта и минималистичка контролна табла, додека специјалната летечка верзија ќе биде едносед.
И покрај демонстрацијата, „Роудстер“ засега не претставува класичен летечки автомобил што може слободно да се користи во воздушниот сообраќај. Прикажаните можности се ограничени на специјални маневри, а верзијата „Rocket“ нема одобрение за редовно користење на јавните патишта.
„Тесла“ планира производството да започне во 2028 година, што претставува ново одложување во однос на првичните најави. Маск уште во 2017 година го претстави концептот на новиот „Роудстер“, со ветување дека испораките ќе започнат во 2020 година.
Компанијата веќе прима резервации, но конечните цени и деталните технички спецификации на сите верзии сè уште не се целосно објавени.
