Skip to content
Документите од владината седница со која претседавал поранешниот прв вицепремиер Артан Груби денеска се најдоа во центарот на судењето за „Државна лотарија“. Обвинителството ги презентира како дел од доказите за наводните злоупотреби, додека одбраната тврди дека токму тие покажуваат дека дел од обвинетите постапувале со претходна согласност и по насоки на Владата.
Во Основниот кривичен суд Скопје продолжи доказната постапка во предметот во кој, покрај Груби, обвинети се поранешниот директор на „Државна лотарија“ Перпарим Бајрами и уште шест лица. Обвинителството најави дека во текот на процесот ќе изведе вкупно 231 материјален доказ, повеќе вештачења и седум сведоци.
Значаен дел од денешното рочиште беше посветен на 158. седница на Владата, одржана на 6 јуни 2023 година, со која претседавал Груби. Пред судот биле презентирани предлог-дневниот ред, стенографските белешки, записниците и владините заклучоци, како и одлуката поврзана со работењето на Управниот одбор на „Државна лотарија“ и мислење од Министерството за финансии.
Обвинителството ја поврзува оваа документација со својата теза дека биле преземени активности за самостојно приредување електронски игри на среќа и покрај претходно воспоставениот однос со заедничкото друштво „Државна видео лотарија на Република Македонија – Казинос Австриа“.
Според обвинението, Груби предложил усвојување информација за преземање активности за самостојно приредување електронски игри на среќа, а Обвинителството тврди дека таквата одлука не била во надлежност на Владата. Ова е теза на обвинителството која допрва треба да биде докажана и оценета од судот.
Одбраната, пак, истите документи ги толкува поинаку.
Адвокатот Јордан Апостолски, бранител на обвинетиот Бојан Јанев, оцени дека досега презентираните материјали покажуваат дека членовите на Надзорниот одбор постапувале по инструкции и со претходна согласност на Владата. Тој го оцени обвинението како нејасно и контрадикторно и најави дека одбраната ќе тврди дека „Државна лотарија“ законски можела самостојно да приредува електронски игри на среќа.
Додека Обвинителството ги презентирало документите од владината седница, Груби почнал да дава забелешки и да објаснува како биле усвојувани одделни точки.
Судијката Билјана Шуплиновска-Јовевска му укажала дека во оваа фаза доказите ги изведува Обвинителството и дека обвинетите ќе добијат можност да ја изложат својата одбрана и да ги презентираат сопствените докази.
Покрај владините документи, пред судот биле презентирани и договорите за заедничко вложување и основањето на „Државна видео лотарија“, како и известување што странскиот партнер го испратил до Владата во 2022 година. И околу овие документи обвинителството и одбраната имаат различни толкувања за правото на „Државна лотарија“ да организира електронски игри на среќа.
Обвинителството презентираше и обемна финансиска документација поврзана со набавката на видеолотариски терминали – девизни налози, банкарски изводи, фактури, сметки, испратници и аналитички картички.
Според обвинителите, со овие документи треба да се утврди каква опрема била набавена, во кои количини и по кои цени, како била фактурирана и како „Државна лотарија“ ги извршувала плаќањата.
Во предметот се обвинети Артан Груби, Перпарим Бајрами, Башким Авдиу, Методија Димевски, Скендер Мехмети, Бојан Јанев, Фатмир Рамадановски и Александар Димитриоски.
Обвинителството ги товари за злоупотреба на службената положба и овластувањето и тврди дека со дејствијата опфатени со обвинението на „Државна лотарија“ ѝ била предизвикана штета од 596.125.511 денари, односно околу 9,7 милиони евра.
Сите обвинети претходно се изјаснија дека не се виновни. Постапката е во фаза на изведување на доказите на Обвинителството, по што свои докази и аргументи ќе презентира одбраната.
