Skip to content
Хуманоидни роботи, нови енергетски технологии и инвестициски проекти во недвижности се дел од понудата на двата меѓународни саема што денес почнуваат во Скопје. ЕНЕРГО ТЕХНОМА 2026 и РЕАЛ ЕКСПО 2026 ќе се одржуваат до 31 октомври во СЦ „Борис Трајковски“.
Двата саема ги обединуваат компаниите, инвеститорите, производителите и експертите од енергетиката, технологијата, индустријата и градежниот сектор.
Свеченото отворање е најавено за 11 часот, со присуство на министерката за енергетика, рударство и минерални суровини Сања Божиновска и министерот за дигитална трансформација Стефан Андоновски.
Хуманоидни роботи и нови технологии
Една од атракциите на ЕНЕРГО ТЕХНОМА ќе биде претставувањето на хуманоидни роботи во соработка со словенечката технолошка компанија „Хипроџект“ (Hiproject).
Посетителите ќе можат да се запознаат со можностите за примена на роботиката во индустријата, логистиката, фармацевтската индустрија, здравството и туризмот.
Програмата опфаќа и решенија за автоматизација, обновливи извори на енергија, електрична мобилност, циркуларна економија и дигитална трансформација.
На изложбен простор од над 3.000 квадратни метри ќе бидат претставени производи, технологии и услуги од повеќе индустриски сектори. Во фокусот ќе бидат и можностите за модернизација на производството, примената на вештачката интелигенција и инвестициите во енергетска ефикасност и зелена транзиција.
РЕАЛ ЕКСПО ги обединува инвеститорите и градежниот сектор
Паралелно се одржува и РЕАЛ ЕКСПО 2026, саем посветен на недвижностите, кој ги обединува градежните компании, инвеститорите, агенциите и другите професионалци од секторот.
Покрај претставувањето на актуелните понуди и инвестициските проекти од Македонија и регионот, програмата предвидува дискусии за современите градежни технологии и материјали, енергетската ефикасност, зелената градба и квалитетот на домувањето.
Предвидени се и теми поврзани со движењата на пазарот на недвижности, урбаната инфраструктура и заштитата на купувачите.
Двата саема ќе траат до 31 октомври во Т Арена, во СЦ „Борис Трајковски“ во Скопје. Организаторите најавуваат стручни презентации, панел-дискусии, промоции и деловни средби.
