Skip to content
Во Македонија досега се регистрирани 58 случаи на западнонилска треска, а бројот на починати достигна осум, соопшти денеска СДСМ. Според партијата, регистриран е и прв случај во Свети Николе.
Од СДСМ повторно ја обвинија Владата дека задоцнила со превентивните мерки и со реакцијата на ширењето на вирусот.
„Не се ова само статистички бројки, ова се човечки животи“, порачаа од партијата, додавајќи дека со недели предупредувале на потребата од навремено прскање против комарци и посилен системски одговор.
Според СДСМ, институциите реагираат дури откако бројот на заболени ќе почне да расте, а партијата оценува дека недостигала навремена превенција и координација.
Опозициската партија повторно ја поврза состојбата со западнонилската треска со претходната здравствена криза во Гостивар, оценувајќи дека и во двата случаи имало доцнење на институциите и недоволна превенција.
Од СДСМ наведуваат дека во Гостивар околу 5.000 граѓани побарале медицинска помош и дека, осум недели подоцна, јавноста сè уште го нема целосниот извештај за водата.
„Две здравствени кризи, ист модел на однесување – задоцнета реакција, недоволна превенција, институционален хаос, молк и никаква одговорност“, порачаа од СДСМ.
Од партијата бараат одговорност од надлежните и тврдат дека последиците од, како што велат, нефункционалниот систем директно ги чувствуваат граѓаните.
