Skip to content
Само три недели по отворањето на реконструираниот студентски дом „Стив Наумов“, студентите пријавија протекување вода, влага во ѕидовите и проблеми со греењето. Но, наместо одговори за квалитетот на реконструкцијата, извршениот надзор и одговорноста за недостатоците, министерката за образование и наука Весна Јаневска ја насочи својата реакција кон СДСМ, тврдејќи дека условите во домот се „одлични“.
„Условите во ‘Стив Наумов’ се одлични, а храната согласно пропишани нутритивни стандарди и тоа може да се види во секое време“, напиша Јаневска на Фејсбук.
Но, фотографиите и поплаките за состојбата во домот не се само дел од партиска пресметка. Тие беа објавени на студентската платформа „Студентарија“, додека за проблемите алармираше и студентската иницијатива „Студентски отпор“.
Во својата реакција Јаневска ги повикува претставниците на опозицијата да го посетат домот и да направат увид, обвинувајќи ги за обид за дискредитација на Министерството.
Сепак, студентите и граѓаните имаат право на многу поконкретни одговори. Кој го вршел стручниот надзор над реконструкцијата? Дали при техничкиот прием биле утврдени недостатоци? Кој потврдил дека објектот е подготвен за вселување и како само неколку недели по отворањето се појавиле пријави за влага и протекување вода?
Реконструкцијата на „Стив Наумов“ и „Кузман Јосифовски-Питу“ е дел од инвестиција од околу 20 милиони евра. Станува збор за значителни јавни средства, поради што транспарентноста за изведените работи, надзорот и гаранциите не треба да биде заменета со политички обвинувања.
Јаневска наведува дека објектот е под гаранција и дека изведувачот ги санира изолираните недостатоци. Во истата објава посочува случаи на затната канализација, активирани аларми, откорнат радијатор и непрописно паркирање во дворот.
Но, овие примери не објаснуваат што ја предизвикало влагата во ѕидовите, дали пријавеното протекување е последица на недостатоци во изведбата и кога проблемите ќе бидат целосно отстранети.
Нема независна стручна проценка што би покажала колкав е обемот на недостатоците и дали тие се резултат на пропусти при реконструкцијата. Токму затоа е потребно Министерството да ги објави релевантните информации за надзорот, приемот на објектот и санацијата.
Студентите и граѓаните не бараат нова политичка пресметка, туку одговор како инвестиција вредна милиони евра резултирала со пријави за протекување вода само неколку недели по отворањето.
Одговорноста не се утврдува со споредување со претходната власт, туку со документација, стручни наоди и конкретни рокови за отстранување на недостатоците.
