Затворање и казни за маркети и увозници поради незаконски високи маржи

Осум компании, меѓу кои три од најголемите увозници на овошје и зеленчук, добија забрана за работа во траење од 15 дена и високи парични казни поради целосно непочитување на владината одлука за ограничување на бруто маржите. Меѓу затворените компании има и три помали маркети и една аптека, соопшти Државниот пазарен инспекторат, нагласувајќи дека кај увозниците на овошје и зеленчук се утврдени екстремно високи маржи.

„Од влезот на производот на граница до рафтовите во маркетите, просечната бруто профитна маржа изнесува околу 70%. Свесни сме дека пазарот е мал, но 70% е премногу“, изјави Влатко Стојкоски од Инспекторатот.

Контролите опфатија 365 трговци на мало и 64 трговци на големо, односно околу 1.000 продажни објекти и дистрибутери. Непочитување на законите за трговија и заштита на потрошувачите е утврдено кај 36 компании, а за дополнителни 30 субјекти сè уште се обработуваат случаи.

Владината одлука за ограничување на маржите опфаќа над 1.000 производи и важи до 30 април 2025 година. Основните прехранбени производи, како леб, млеко, брашно, јајца и масло за јадење, имаат ограничена маржа од 5%. За месо, шеќер, млечни производи, ориз и тестенини, маржата е 10%, додека за свежо овошје и зеленчук, хигиенски производи и бебешка храна е 15%. Владата очекува дека оваа мерка ќе доведе до намалување на цените на основните производи за околу 10%.