Skip to content
Земјоделци од Струмичко разговараа со амбасадорките на Германија и Холандија за европските земјоделски политики, новите технологии, климатските промени и можностите што европската интеграција може да ги отвори за производителите во Македонија.
Средбата се одржа во Јуроп хаус Струмица во рамки на „Кафе со амбасадори“, а учествуваа германската амбасадорка Петра Дрекслер и холандската амбасадорка Узлем Џанел, како и претставници на земјоделскиот, академскиот и невладиниот сектор.
Во фокусот беше Заедничката земјоделска политика на Европската Унија и нејзиното влијание врз производството, субвенциите, заштитата на животната средина и развојот на руралните средини.
Дел од разговорот беше посветен и на тоа што прилагодувањето кон европските земјоделски правила би значело за малите и средните производители во Македонија, особено во региони како Струмичкиот, каде земјоделството е една од клучните економски дејности.
Амбасадорките ги презентираа искуствата на Германија и Холандија во обидите да се задржи високото земјоделско производство, а истовремено да се намали влијанието врз почвата, водата и биодиверзитетот.
Се разговараше и за климатските промени и потребата земјоделството да се приспособува на новите временски услови без да ја загуби конкурентноста.
Меѓу темите беа прецизното земјоделство, современите стакленички технологии, дигитализацијата, истражувањето и земјоделските задруги како начини за зголемување на продуктивноста и намалување на трошоците.
Посебно беше нагласен потенцијалот на Струмичкиот регион, кој има долга традиција во градинарското производство, плодна почва и пристап до регионалните пазари. Учесниците разговараа за потребата овие предности да се надградат со нови технологии, подобра организација на производителите и поголем пристап до европските програми.
Јуроп хаус Струмица е дел од мрежата на центри на Делегацијата на Европската Унија во Македонија, создадени како простор за дебати, едукација и поврзување на локалните заедници со европските политики и можности.
Средбата заврши со разговор за иднината на земјоделството и за можностите преку иновации, одржливи практики и европски инструменти за поддршка да се подобри конкурентноста на домашните производители.
