Албанија со аларм за ризик од поплави и свлечишта во северниот дел на земјата

Албанија

Националната агенција за цивилна заштита (AKMC) на Албанија издаде предупредување за влошување на временските услови во неколку региони во земјата, укажувајќи на интензивни врнежи кои би можеле да предизвикаат локализирани поплави и проблеми во планинските предели, пренесува албанската радио-телевизија.

Според прогнозите на Институтот за геонауки (IGJEO) и Воената метеоролошка служба, денес, 18 ноември, во регионот на Скадар се очекуваат интензивни, а на места и многу интензивни врнежи од дожд.

Во исто време, во регионите Кукс, Дибер и Лежа се очекуваат умерени до интензивни врнежи, проследени со невреме во одредени области.

Се очекува ваквата состојба да продолжи и утре, 19 ноември, кога, според метеоролошките прогнози, во областите Скадар и Кукс се очекуваат интензивни, а на места и многу интензивни врнежи, додека во областа Дибер исто така ќе има интензивни врнежи.

Надлежните предупредуваат дека обилните врнежи може да доведат до задржување на вода и локализирани поплави во урбаните средини. Исто така, потребна е зголемена внимателност во планинските предели поради ризикот од излевање на водотеци и можна појава на свлечишта.

Од AKMC информираат дека побарале од локалните структури да преземат превентивни мерки, континуирано да ги следат ризичните подрачја и да ги одржуваат потребните капацитети за итни интервенции.

Во своето соопштение, Агенцијата апелира до граѓаните да бидат внимателни при движењето, особено во областите што се најмногу изложени на лошите временски услови, како и да ги следат официјалните известувања и упатствата од надлежните институции.

Од AKMC нагласуваат дека продолжуваат да ја следат состојбата на терен и да се координираат со сите релевантни структури, ставајќи го приоритетот на безбедноста и заштитата на граѓаните.

Рацин.мк ве прашува:

Кој најмногу придонесува говорот на омраза да стане нормална појава во Македонија?

Најчитано

Рацин.мк ве прашува:

Кој најмногу придонесува говорот на омраза да стане нормална појава во Македонија?