Skip to content
Европската Унија очекува претстојните избори во Србија да бидат организирани во согласност со европските стандарди и најави дека внимателно ќе го следи целиот изборен процес.
Од Европската комисија за Н1 изјавиле дека слободните и фер избори се основа на демократското општество и важен дел од обврските што Србија ги презела како земја кандидат за членство во ЕУ.
„Очекуваме изборите да бидат организирани во согласност со европските стандарди и внимателно ќе го следиме процесот“, порачале од Брисел.
ЕУ очекува српските институции да обезбедат транспарентен и инклузивен изборен процес, во кој сите политички актери ќе имаат еднакви услови за учество. Посебно внимание се посветува на спроведувањето на препораките на Канцеларијата на ОБСЕ за демократски институции и човекови права – ОДИХР.
Меѓу прашањата што подолго време ги отвораат европските институции и набљудувачките мисии се точноста на избирачкиот список, независноста на институциите, медиумскиот плурализам, спречувањето притисоци врз гласачите и раздвојувањето на државните од партиските активности.
Најавата од Брисел доаѓа во период на продолжена политичка криза и повеќемесечни антивладини и антикорупциски протести во Србија. Српскиот претседател Александар Вучиќ претходно најави можност за предвремени парламентарни избори, но конечниот датум треба да биде официјално потврден.
За Србија, квалитетот на изборниот процес ќе биде и еден од показателите според кои ЕУ ќе го оценува напредокот во областа на владеењето на правото, демократските институции и пристапните реформи.
