Skip to content
Албанскиот премиер Еди Рама ја игнорирал „Фламинго револуцијата“ и со инсистирањето на контроверзниот туристички проект поврзан со Џаред Кушнер придонел за ескалација на протестите во Албанија, обвини холандската европратеничка Тинеке Стрик. Таа предупредува дека владата се обидува да ја забрза изградбата пред земјата да биде обврзана целосно да ги применува европските еколошки стандарди.
„Доколку албанската влада сериозно ја сфатеше Фламинго револуцијата, денес немаше да бидеме во оваа ситуација“, изјави Стрик за британски „Гардијан“.
Според неа, студентските протести што прераснаа во насилни судири со полицијата се последица на долгогодишното незадоволство на граѓаните, кои сметаат дека институциите ги игнорираат нивните барања.
Протестното движење започна во април како отпор против изградбата на луксузен туристички комплекс во еколошки чувствителното подрачје Вјоса-Нарта, на јадранскиот брег на Албанија.
Проектот, вреден околу четири милијарди евра, е поврзан со Џаред Кушнер, зет на американскиот претседател Доналд Трамп, и неговата сопруга Иванка Трамп.
Плановите предвидуваат изградба на голем туристички комплекс со илјадници сместувачки единици во подрачје што претходно имало законска заштита поради неговото природно богатство.
Албанската влада претходно го измени законодавството, овозможувајќи им на стратешките инвеститори да градат во делови од заштитената зона.
Европскиот парламент уште во јуни побара укинување на спорните законски измени, предупредувајќи дека заштитата на животната средина е еден од условите за членство во Европската Унија.
Стрик смета дека албанските власти се обидуваат да создадат фактичка состојба на терен пред земјата да стане членка на ЕУ.
„Го обвинувам Рама дека им служи на сопствените интереси и на интересите на Кушнер, наместо на животната средина и на албанскиот народ“, изјави европратеничката.
Таа побара Европската Унија поостро да реагира на обидите, како што оцени, да се заобиколат европските правила за заштита на природата.
Рама ги отфрли обвинувањата, оценувајќи дека станува збор за непостојни еколошки заговори. Тој ја повика Стрик да го осуди насилството во Тирана, наместо, според неговите зборови, да ги повторува ставовите на руското Министерство за надворешни работи.
Албанскиот премиер претходно го бранеше туристичкиот проект како значајна инвестиција што ќе придонесе за развојот на економијата и туризмот.
Во меѓувреме, протестите против изградбата прераснаа во пошироки антивладини демонстрации, предводени од студенти кои бараат подобро образование, повисок животен стандард и борба против корупцијата.
Во изминатите денови во Тирана и други градови дојде до жестоки судири со полицијата, при што беа запалени и оштетени јавни објекти, банки и деловни простории. Полицијата употреби солзавец и водени топови, а приведени се голем број демонстранти.
Студентите бараат оставка од Рама, но тој одбива да се повлече, тврдејќи дека протестите ја загрозуваат европската иднина на Албанија.
Александар Трајче, претставник на една од најстарите албански организации за заштита на природата, оцени дека навремена реакција од Европската Унија можела да спречи мирните еколошки протести да прераснат во насилни немири.
Европската комисија го осуди насилството и го нагласи правото на граѓаните на мирни протести.
Албанија има цел да ги заврши преговорите за членство во ЕУ до крајот на 2027 година, а владата на Рама најавува членство во 2030 година.
Спорот околу туристичкиот комплекс сега отвора дополнителни прашања за усогласеноста на албанските закони со европските стандарди, во период кога земјата се обидува да го забрза пристапниот процес.
