Skip to content
Неодамнешните изјави на американскиот претседател Доналд Трамп дека Русија постапува коректно кон Украина предизвикаа остри реакции меѓу европските сојузници и дипломати. Во Брисел и европските престолнини расте загриженоста дека Вашингтон сè поотворено се приближува кон позицијата на Владимир Путин, додека официјален Киев останува под притисок.
Американскиот претседател Доналд Трамп изјави дека Русија била коректна кон Украина и оти двете страни не сносат подеднаква одговорност за воениот конфликт. Оваа оценка доаѓа во период на интензивирани воздушни напади врз украинските градови, што дополнително ги засили сомнежите на европските сојузници околу долгорочната безбедносна политика на Соединетите Американски Држави.
Високата претставничка на Европската Унија за надворешна политика и безбедност, Каја Калас, пред Европскиот парламент оцени дека американските преговарачи вршат постојан притисок врз Киев за отстапки. Според неа, Украина досега не попуштила пред условите на Москва исклучиво благодарение на европската помош.
Европските дипломати и безбедносни аналитичари посочуваат дека личниот однос на Трамп кон украинскиот претседател Володимир Зеленски игра важна улога во креирањето на американскиот став. Според нивните проценки, американскиот претседател покажува поголема подготвеност за соработка со автократски лидери и отворено бара економски можности за американските компании, додека традиционалните сојузнички врски ги става во втор план.
Во Киев и во западноевропските престолнини ваквото редефинирање на улогата на САД отвора стравувања дека евентуалните мировни преговори ќе се водат под услови што значат значајно слабеење на украинските позиции. Европските функционери предупредуваат дека зачувувањето на украинскиот суверенитет зависи од подготвеноста на Европа самостојно да ја одржи финансиската и воената помош.
