Skip to content
Западнонилската треска се шири низ регионот во периодот кога активноста на комарците е највисока. Албанија го потврди првиот случај за 2026 година во Корчанскиот округ, Хрватска регистрира три заболени во јули и август, додека во Македонија бројот на потврдени случаи се искачи на 44, со пет смртни исходи.
Албанското Министерство за здравство во понеделникот, 24 август, соопшти дека првиот потврден случај годинава бил откриен во Корчанскиот округ во вторите десет дена од август.
Од почетокот на годината во Албанија биле тестирани 30 примероци од сомнителни случаи и сите претходно биле негативни. По потврдата, Институтот за јавно здравје започнал епидемиолошка и ентомолошка истрага и продолжува да ја следи состојбата.
Корча е особено важна за Македонија поради непосредната географска близина и интензивното движење на луѓе во пограничниот регион.
Истиот ден пристигна потврда и од Хрватска. Хрватскиот завод за јавно здравство соопшти дека три лица се заразиле со вирусот во текот на јули и август. Случаите се регистрирани во источните, централните и северозападните делови на земјата.
Во Македонија состојбата е далеку посериозна. На 24 август министерот за здравство Сашо Клековски соопшти дека досега се потврдени 44 случаи на западнонилска треска. Пет лица починаа.
Според Министерството за здравство, најголем дел од пациентите кои биле хоспитализирани развиле невроинвазивна форма на болеста. Од почетокот на епидемијата 21 пациент бил отпуштен на домашно лекување, а на 24 август било најавено отпуштање на уште четворица.
Во исто време, силен раст на заразата бележи и Грција.
До 19 август таму биле регистрирани 157 локално стекнати инфекции и 13 смртни случаи. Само во една недела биле евидентирани уште 47 заболени и четири смртни исходи.
Грчките здравствени власти сега испитуваат и дали нов сој на вирусот може да има улога во наглиот раст на бројот на случаи. Се спроведуваат дополнителни лабораториски и генетски анализи, а експертите предупредуваат дека интензивна циркулација на вирусот може да продолжи уште најмалку еден месец.
Западнонилската треска не се пренесува од човек на човек со вообичаен контакт. Главниот пат на заразување е убод од инфициран комарец, кој претходно го добил вирусот од заразена птица.
Околу 80 проценти од инфицираните воопшто немаат симптоми. Кај дел од луѓето се појавуваат температура, главоболка, болки во телото, слабост, повраќање или осип. Кај помалку од еден процент инфекцијата може да го зафати централниот нервен систем и да предизвика менингитис или енцефалитис.
Поголем ризик од тешка форма имаат повозрасните лица, луѓето со ослабен имунитет и пациентите со одредени хронични заболувања.
Здравствените власти препорачуваат употреба на средства против комарци, облека што покрива поголем дел од телото, мрежи на прозорците и отстранување на застоената вода од дворовите, балконите и околината на домовите.
Нема вакцина за луѓе против вирусот Западен Нил, ниту специфичен антивирусен лек. Затоа превенцијата од убоди од комарци останува главната заштита во периодот на засилена циркулација на вирусот.
