Skip to content
Сè поголем број на богатите Американци отвораат банкарски сметки во Швајцарија како дел од стратегијата за „деамериканизација“ на своите инвестициони портфолија, тврдат инвеститори и банкари.
Швајцарските банки бележат зголемен интерес и отворање на инвестициони сметки од страна на Американци со високо нето богатство во последните месеци. Пјер Габрис, извршен директор на швајцарската финансиска консултантска фирма Alpen Partners International, вели дека овие настани се случуваат во таласите. „Кога беше избран (поранешниот претседател Барак Обама), имавме првиот голем талас. Потоа дојде ковидот. Сега, царините предизвикуваат нов талас.“
Габрис објаснува дека клиентите имаат различни причини за отворање на сметки. Многу од нив сакаат да ја диверзифицираат својата имотна структура и да се дистанцираат од доларот, за кој веруваат дека дополнително ќе ослаби поради експлозијата на американскиот долг. Швајцарија е привлечна поради својата политичка неутралност, стабилната економија, силната валута и сигурниот правен систем.
Други се мотивирани од политичката ситуација и, како што тврдат, падот на владеењето на правото во САД за време на администрацијата на Трамп. Некои од нив одат и подалеку – отвораат швајцарски сметки за да купуваат физичко злато во земјата која е позната по складирањето и рафинеријата на злато.
Габрис исто така додава дека многу клиенти бараат можност за престој или дури државјанство во Европа и сакаат да купат недвижности. „Тоа им е план Б“, додава тој.
Отворањето сметка во швајцарски банки е релативно едноставно, но мора да биде во согласност со строгите американски закони за финансиско извештавање. Иако големите американски банки не можат директно да отворат швајцарски сметки за клиенти, повеќето имаат партнерски односи со швајцарски фирми кои се регистрирани при американската Комисија за хартии од вредност (SEC) и кои можат да работат со американски инвеститори.
Вонтобел SFA, за која се смета дека е најголемата швајцарска банка регистрирана при SEC за работа со американски клиенти, одбила да коментира. Приватната швајцарска банка Pictet посочува дека забележала „значителен пораст“ на барањата во својата швајцарска филијала Pictet North America Advisors, која е регистрирана при SEC.
Додека отворањето швајцарска сметка порано можеше да има конотација за утја на данок, денес овој процес е строго регулиран, вклучувајќи детални даночни пријави и извештаи.
„Многу Американци денес разбираат дека нивното целокупно портфолио е во американски долари, па размислуваат: ’Можеби треба да се диверзифицира’“, заклучува Габрис.
