Skip to content
Русија ја започна изградбата на сопствен сателитски интернет-систем „Расвет“, кој во тамошните медиуми веќе се нарекува руски одговор на SpaceX и на мрежата Starlink на Илон Маск. Според анализата на WIRED, проектот не е само технолошка, туку и геополитичка и воена амбиција на Москва, која сака да изгради сопствена независна комуникациска инфраструктура.
Во март годинава, руската компанија Bureau 1440 лансираше 16 сателити во ниска орбита од космодромот Плесецк, со помош на ракетата „Сојуз-2.1Б“. Ова е првиот чекор кон планираната мрежа од најмалку 300 сателити до 2030 година, со цел да обезбеди брз интернет низ целата територија на Русија, вклучително и во оддалечените арктички региони.
Проектот се споредува со „Старлинк“, кој се покажа како клучен за комуникациите на украинската армија за време на војната. Токму искуството од Украина, според експертите, ја натерало Русија да инвестира во сопствен систем што ќе може да се користи и за цивилни и за воени цели. Дополнителен сигнал за военото значење е фактот што лансирањето го организирало руското Министерство за одбрана, а не цивилната агенција Роскосмос.
„Расвет“ треба да овозможи интернет со брзина до 1 гигабит во секунда и латенција од околу 70 милисекунди, но аналитичарите предупредуваат дека Русија е далеку зад „Старлинк“, кој веќе има илјадници активни сателити. Главниот предизвик ќе биде масовното производство на сателити и развојот на полесни и поевтини терминали за корисниците.
Дополнителни сомнежи предизвикува и сопственичката структура на проектот. „Бјуро 1440“ е дел од холдингот „ИКС“, кој според независни руски медиуми има врски со системи за интернет-надзор и безбедносните структури на Кремљ. Затоа дел од експертите сметаат дека „Расвет“ е многу повеќе од интернет-проект – станува збор за нова инфраструктура за дигитален суверенитет и идни воени конфликти во вселената.