Ако ви е изгребан паркетот, ова е лесен трик за да го обновите

Изгребаниот паркет не мора веднаш да значи скапо брусење и ново лакирање. Кај плитките, површински оштетувања, доволно е понекогаш да се врати сјајот и визуелно да се ублажат гребнатините, без голема интервенција и без прав низ целиот дом.

Еден од триковите што деновиве повторно се споделува на социјалните мрежи е во млака вода да се додадат две капачиња омекнувач за алишта, па со добро исцедена микрофибер крпа нежно да се пребришат местата каде што има ситни траги и мат слој.

Идејата е подот да добие порамномерен сјај, а фините гребнатини оптички да станат помалку видливи.

Причината поради која ваквиот трик може да даде ефект е тоа што кај лакувани површини тенок слој од средството привремено ја подобрува рефлексијата на светлината. Но, тоа не е трајна поправка, туку повеќе козметичко освежување на површината.

Кај подлабоки гребнатини, каде што е зафатено самото дрво, ваквото решение најчесто не е доволно.

За подлабоки оштетувања, како поблага домашна варијанта често се споменува орев. Со половина орев нежно се тријат оштетените места, за природните масла да навлезат во линијата на гребнатината и визуелно да ја израмнат бојата со остатокот од подот.

Кај посериозни оштетувања, пак, најчесто се препорачуваат средства наменети за дрвени подови, восочни стапчиња, коректори за дрво или полнила што се усогласуваат со бојата на паркетот.

Сепак, со дрвен под треба внимателно. Совети за одржување на паркет укажуваат дека не треба да се користи премногу вода, ниту агресивни раствори, бидејќи влагата и несоодветните средства можат дополнително да ја оштетат завршната облога.

Затоа, ако се пробува ваков домашен трик, крпата треба да биде само благо навлажнета, а не мокра, а прво е најдобро да се тестира на мал и незабележлив дел.