Бројот на загинати во Шпанија се искачи на 205, мобилизирани се дополнителни единици на армијата поради најавата од нови дождови

Бројот на загинати во поплавите во Шпанија оваа недела се искачи на 205, а бидејќи жителите во регионот на Валенсија се предупредени да се подготват за нови дождови, а дополнителни 500 војници се распоредени да помогнат во спасувачките операции.

Државната метеоролошка агенција Аемет соопшти дека четири региони, вклучително и Валенсија, останале под црвена тревога поради ризикот од нови дождови и бури, неколку дена откако реките со вода обоена со кал направија пустош во областа.

Во четвртокот Аемет предупреди дека се очекува неповолните временски услови да продолжат и во наредните денови. „Ќе испратиме јасна порака“, напиша агенцијата на социјалните мрежи. „Метеоролошката вонредна состојба не е завршена. Невремето сè уште продолжува над Шпанија“.

Неколку дена откако поројните поплави се проширија низ делови од земјата, однесоа мостови, автомобили и улични светла, бројот на исчезнати лица останува непознат.

Поголемиот дел од пријавените загинати се во регионот на Валенсија, каде претходно оваа недела повеќе од 1.000 војници од шпанската единица за одговор при итни случаи беа распоредени за да ги засилат напорите на локалните служби за итни случаи.

Во петокот, шпанската министерка за одбрана, Маргарита Роблес, рече дека уште 500 војници се испратени во регионот и дека може да бидат испратени повеќе доколку е потребно. „Нивните мисии вклучуваат помагање да се извлечат луѓе кои можеби се наоѓаат во подрумите или пониските катови – за жал ги има многу – и помагање да се испумпува водата [од патиштата] за да се овозможи транспорт, за да можат храната и водата да стигнат иние на кои им е најпотребно.

Беше распоредена и мобилна мртовечница, заедно со психолози, како и специјализирани тимови способни да ги лоцираат телата. „Ова е ужасна трагедија“, изјави таа за телевизијата RTVE. „Мора да се има на ум дека ова е бура без преседан, не само во овој век, туку дури и во последниот“.

Ситуацијата и понатаму е страшна во многу од погодените области. Илјадници остануваат без пристап до вода или здрава храна, додека делови од најтешко погодените области остануваат недостапни.