Филмот „Преекспонирано“ на Венинова во официјалната конкуренција на фестивал во Катанија

Македонскиот филм „Преекспонирано” на Елеонора Венинова ќе се натпреварува во официјалната главна селекција на фестивалот КинЕст фест 2023 кој ќе се одржи во Катанија, Италија.

Ова е трето издание на фестивалот кој е фокусиран на кинематографијата на Источна и Централна Европа, а ќе трае од 5 април до 30 мај. Фестивалот освен филмски премиери одржува и многубројни специјални настани, работилници, настапи во живо, ретроспективи и мастеркласови посветени токму на кинематографијата од нашиот регион.

Премиерата на „Преекспонирано” на овој фестивал ќе се одржи на 7 и 8 мај, а режисерката Елеонора Венинова ќе одржи и работилница.

Светската премиера на филмот „Преекспонирано” се случи на Меѓународниот филмски фестивал во Каиро – фестивал од А категорија, кој се одржа од 13 до 22 ноември минатата година – на кој „Преекспонирано“ учествуваше во официјалната конкуренција. Азиската премиера, пак, се одржа на Меѓународниот филмски фестивал во Пуне, Индија, од 2 до 9 февруари оваа година. Во тек се интензивни подготовки и за премиера пред домашната публика.

Венинова е и сценаристка, а улогите ги толкуваат Камка Тоциновски, Благој Веселинов, Сара Климоска, Марјан Наумов. Кинематографер е Лев Предан Коварски, музиката е на Линдзи Рајт, сценографијата на Срѓан Митровиќ. Монтажер на филмот е Гоце Кралевски, костимограф Жаклина Крстевска, монтажер за звук Дарко Спасовски.

Продуцент на „Преекспонирано“ е Гоце Кралевски (ДНФ ФИЛМС), копродуцент Мирјана Томиќ (ЛИЛИТ-Србија). Филмот е поддржан од Агенција за Филм, Српски Филмски Центар и Еуримаж.