Skip to content
Германските соларни и ветерни електрани сè почесто го намалуваат или целосно го запираат производството во периоди кога понудата на електрична енергија е поголема од побарувачката, а берзанската цена паѓа под нулата.
Во првата половина од 2026 година, комерцијалното ограничување на производството во Германија пораснало за 20 отсто – од 1.216 на 1.463 гигават-часови. Истовремено, бројот на часови со негативна цена се намалил од 389 на 299, што значи дека при секое појавување негативна цена бил исклучуван поголем обем обновливо производство. Податоците се од анализа на компанијата „Монтел“, објавена од „Еуроњуз“.
Негативна цена се појавува кога во мрежата има повеќе струја отколку што потрошувачите и индустријата можат да преземат. Бидејќи сонцето и ветерот произведуваат според временските услови, а не според моменталната побарувачка, во одредени часови операторите се принудени да го намалат производството.
Дополнителен поттик за исклучување создаде германскиот Закон за соларните врвови. Новите постројки ја губат гарантираната финансиска поддршка веднаш штом берзанската цена стане негативна, поради што за операторите е поисплатливо привремено да престанат да произведуваат отколку да продолжат со загуба.
Германската мрежа има и физички ограничувања. Голем дел од ветерната енергија се произведува на северот, додека најголемите индустриски потрошувачи се на југот. Кога преносната мрежа не може да ја пренесе целата произведена струја, производството во еден регион се намалува, а во друг се активираат резервни централи. Германската мрежна агенција очекува дека напредокот во изградбата на далноводите ќе ја намали потребата од вакви интервенции.
Како главно решение се посочува забрзано вложување во батериски системи, кои би ја складирале струјата во часовите на вишок и би ја враќале во мрежата кога побарувачката ќе порасне. Капацитетот на комерцијалните и индустриските батерии во Германија се очекува да се зголеми од девет гигават-часови во 2026 на 24 гигават-часови во 2028 година.
Второто решение се паметните броила и флексибилните тарифи, со кои домаќинствата би плаќале пониска цена кога има вишок соларна и ветерна енергија. Третото е поголема електрификација на транспортот и греењето, со која електричните возила, топлинските пумпи и индустриските системи би ја зголемиле потрошувачката токму во часовите на најголемо производство.
Меѓународната агенција за обновлива енергија оценува дека комбинирањето соларни и ветерни електрани со батерии веќе може да обезбеди континуирано снабдување по цена конкурентна на новите централи на фосилни горива во регионите со добри природни услови.
Проблемот доаѓа во период кога обновливите извори обезбедиле 45,5 отсто од вкупното производство на електрична енергија во ЕУ во првиот квартал од 2026 година. Ветерот учествувал со 44,9 отсто во обновливото производство, хидроенергијата со 28, а сончевата енергија со 17,3 отсто.
