Skip to content
Одмор во Хрватска минатото лето, „научно-образовна екскурзија“ во Белгија ова лето и денешно уверување дека не е љубител на големи годишни одмори со солена вода и песочни плажи. Премиерот Христијан Мицкоски денес понуди детално објаснување за своето семејно патување во Белгија, но во приказната изостана еден незгоден факт: во август 2025 година токму владината прес-служба потврди дека тој користи годишен одмор во Хрватска.
Мицкоски денеска објасни дека околу една недела бил надвор од Македонија со своите синови и дека патувањето било дел од семејната традиција еднаш годишно да посетуваат европски град, да разгледуваат значајни места и да ја изучуваат историјата на земјата што ја посетуваат.
Белгиското патување го опиша како „научно-образовна екскурзија“, со четири дена во Бриж и три дена во Брисел, каде, според неговото објаснување, имал и три средби со потенцијални инвеститори.
Но, во обидот да објасни зошто патувањето не било класичен летен одмор, Мицкоски отиде и чекор понатаму. Рече дека не е љубител на „големи годишни одмори со солена вода и песочни плажи“.
Само една година претходно, сепак, јавноста доби многу поедноставно објаснување.
На 7 август 2025 година од владината прес-служба беше потврдено дека премиерот користи годишен одмор и дека престојува во Хрватска. Од Владата тогаш информираа дека станува збор за кратка пауза пред неговото враќање на работните обврски.
Токму тука денешната изјава на Мицкоски добива поинаква тежина. Не затоа што е спорно премиер да оди на одмор, ниту затоа што јавноста треба да одлучува дали тој повеќе сака море, планина или европски градови. Туку затоа што неговото денешно објаснување е во очигледен контраст со сликата што јавноста ја доби само едно лето претходно.
Лани на годишен одмор во Хрватска. Годинава, патување во Белгија кое премиерот внимателно го дистанцира од поимот „класичен одмор“, нарекувајќи го научно-образовна екскурзија и дополнувајќи дека не е љубител на солена вода и песочни плажи.
Уште на крајот на јули Мицкоски најави дека со семејството ќе патува во Белгија и нагласи дека „нема да има класичен одмор“. Рече дека со своите деца традиционално посетува европски градови и историски места. По враќањето, објаснувањето стана уште подетално: екскурзијата доби образовен карактер, престојот во Брисел и деловна компонента поради средбите со инвеститори, а јавноста дозна и каков тип летување премиерот наводно не претпочита.
Паралелата со минатото лето затоа тешко може да се избегне. Во август 2025 година Владата директно соопшти дека Мицкоски е на годишен одмор во Хрватска. Една година подоцна премиерот има потреба детално да објасни дека не сака долги летувања со солена вода и песочни плажи.
Дополнителен политички контекст создава и неговата изјава од мај годинава, кога ги повика македонските граѓани летните одмори да ги поминуваат во Македонија, на домашните езера, планини и во селата.
Тоа не го спречи неколку месеци подоцна своето семејно патување да го организира во Белгија, како што ниту денешното дистанцирање од морските одмори не може да го избрише фактот дека минатото лето официјалната информација од Владата беше дека премиерот го користи својот годишен одмор во Хрватска.
