Skip to content
Општина Центар го казни инвеститорот по денешното свлечиште на градилиште во близина на булеварот „Митрополит Теодосиј Гологанов“ и Католичката црква во Скопје, откако при ископ се свлекла земја, бил затрупан багер, а биле оштетени делови од јавната инфраструктура и паркирано возило.
Инспекциските служби на Општина Центар, заедно со екипа на Министерството за внатрешни работи, извршиле увид на локацијата каде што настанало свлечиштето. Според општината, при увидот било констатирано оштетување на коловозот, тротоарската површина, канализациската мрежа и уличното осветлување.
Од Општина Центар информираа дека на инвеститорот веднаш му биле изречени казни и санкции поради непочитување на обврските и предизвикување штета врз јавната инфраструктура. Инвеститорот бил задолжен итно да го обезбеди просторот, да преземе мерки за заштита и санација и да овозможи безбедно движење на граѓаните околу градилиштето.
Локацијата, според општината, е обезбедена со сигурносни појаси и предупредувачки ленти, со цел граѓаните да не се движат низ оштетениот дел. Од Центар најавија дека нема да толерираат несовесно постапување на инвеститори, особено кога се загрозува безбедноста на граѓаните и се оштетува јавен простор.
Инцидентот претходно го потврди и МВР. Според полициските информации, при ископ за изградба на зграда на улицата „Христо Смирненски“ се свлекла земја, при што бил затрупан багерот што работел на градилиштето. Работникот кој управувал со машината успеал навреме да излезе.
Во свлечиштето биле оштетени делови од тротоарот и улицата, а падната бандера оштетила паркирано возило. Засега нема информации за повредени лица, но случајот повторно ја отвора темата за контролата на градилиштата во Скопје и за одговорноста на инвеститорите при градежни зафати во густо населени урбани зони.
