Петтата година од бракот најчесто завршува пред суд

Во Македонија во 2025 година се склучени 10.507 бракови, што е намалување од 5,1 процент во однос на претходната година, додека бројот на разводи е зголемен за 8 проценти, покажуваат новите податоци на Државниот завод за статистика.

Најмногу бракови биле склучени во август – 1.362, односно 13 проценти од вкупниот број. Најмалку венчавки имало во март, кога биле регистрирани 473 брака. Првиот брак и натаму е доминантен, со учество од 92,8 проценти кај жените и 92,1 процент кај мажите.

Просечната возраст за стапување во прв брак изнесува 27,5 години кај невестите и 30,2 години кај младоженците. Најмногу бракови се склучени во старосната група од 25 до 29 години, и кај жените и кај мажите.

Статистиката за разводите покажува поинаква слика. Најголем број разведени бракови имало кај лицата на возраст од 35 до 39 години. Во оваа старосна група се евидентирани 400 разведени жени и 381 разведен маж.

Според траењето на бракот, најризичен е периодот од пет до девет години по венчавката. Во оваа група се случиле 478 разводи, што претставува 21,9 проценти од вкупниот број разведени бракови во 2025 година.

Податоците покажуваат дека бракот сè почесто се склучува подоцна, а најголемиот притисок врз брачната заедница доаѓа во годините кога семејството најчесто веќе се соочува со финансиски, станбени, родителски и професионални обврски. Петтата година, според статистиката, не е формална граница, туку почеток на периодот во кој најмногу бракови не го издржуваат товарот на секојдневието.