Skip to content
Европската Унија става на располагање дополнителни 1,4 милијарди евра за Украина, обезбедени од профитите што ги создаваат замрзнатите средства на Руската централна банка.
Европската комисија денеска, 5 август, соопшти дека средствата биле примени на 3 август и ги опфаќаат приходите акумулирани во првата половина од 2026 година. Ова е петти ваков трансфер, по претходната транша исплатена во март.
Најголемиот дел, односно 95 проценти или околу 1,33 милијарди евра, ќе бидат насочени преку Механизмот за соработка за заеми за Украина. Парите ќе се користат за сервисирање на заемите што земјата ги доби преку иницијативите на Г7 и Европската Унија.
Преостанатите 70 милиони евра ќе бидат распределени преку Европскиот мировен фонд, кој се користи за финансирање воена помош и опрема за Украина.
„Русија мора да плати за уништувањето што го предизвика. Ги користиме приходите од замрзнатите руски средства за да обезбедиме тоа да се случи“, изјави претседателката на Европската комисија Урсула фон дер Лајен.
Одлуката беше објавена по новите руски напади со ракети и беспилотни летала врз Киев и околината, во кои, според украинските власти, загинаа најмалку 17 лица. Фон дер Лајен ги осуди нападите и порача дека средствата ќе ја поддржат Украина во продолжувањето на отпорот против руската воена агресија.
Средствата на Руската централна банка што се наоѓаат во Европската Унија беа замрзнати по почетокот на руската инвазија врз Украина во 2022 година. Самите средства остануваат блокирани, додека ЕУ ги користи дополнителните профити и каматите што се создаваат од нивното чување.
Според Европската комисија, замрзнатите руски средства досега создале вкупно околу осум милијарди евра дополнителни приходи. Правната рамка за нивно користење во поддршка на Украина беше усвоена во мај 2024 година.
