Во Црна Гора уапсен водачот на мрежата „Рибар“ поврзана со руски хибридни операции

Црногорската полиција и Агенцијата за национална безбедност (НСА) спроведоа операција во Рисан, каде што беа уапсени пет лица осомничени за врски со руската мрежа „Рибар“. Информацијата ја објавија неколку црногорски медиуми, повикувајќи се на извори во безбедносните служби.

Според весникот „Победа“, меѓу приведените се Михаил и Валерија Звинчук, кои се наведени како водачи на мрежата, како и тројца нивни соработници.

Повеќе информации се очекуваат по официјалното соопштение од црногорските институции.

„Рибар“ е руска медиумска и информативна мрежа основана во 2018 година од Михаил Звинчук, поранешен вработен во прес-службата на руското Министерство за одбрана. За време на војната во Украина, таа стана еден од највлијателните проруски воени канали на платформата Телеграм.

Звинчук е под санкции на Европската Унија од 2023 година поради неговата поддршка на руската војна против Украина и ширењето пропаганда. ЕУ вели дека тој е член на работна група формирана од рускиот претседател Владимир Путин за координирање на напорите за мобилизација поврзани со војната.

САД и Велика Британија, исто така, го поврзаа „Рибар“ со операции на странско влијание и информациска војна, објави РСЕ/РЛ.

Во 2024 година, американскиот Стејт департмент понуди награда до 10 милиони долари преку својата програма „Награди за правда“ за информации за лица поврзани со проектот „Рибар“. Американскиот департмент наведе сомневања дека мрежата била вклучена во операции на странско влијание.

Во последниве години, „Рибар“ ги прошири своите активности на Западен Балкан, вклучително и во Србија и Босна и Херцеговина.