Топланите ќе продолжат со природен гас, набавката на мазут е законска обврска, велат од ЕСМ

ЕСМ Производство на топлина ДООЕЛ Скопје информира преку соопштение дека јавниот повик за набавка на резервно гориво-мазут, објавен на 31 декември 2024 година, заврши без поднесени понуди. На отворањето на повикот, кое се одржа на 8 јануари 2025 година, ниту еден економски оператор не достави понуда.

Во соопштението се истакнува дека топланите под управување на ЕСМ Производство на топлина користат природен гас како примарно гориво и така ќе продолжат и во иднина. Сепак, законските обврски налагаат обезбедување резерви од алтернативно гориво за најмалку 15 дена работа со полн капацитет, со цел сигурно и континуирано производство на топлинска енергија.

Јавниот повик, кој предвидува рамковна спогодба за набавка до 11.000.000 кг мазут, беше објавен на веб-страницата на АД ЕСМ, во Службен весник и други јавни гласила. Во огласот е дефинирано дека набавката ќе се реализира само ако е потребно, а може и целосно да изостане доколку нема таква потреба.

Соопштението на ЕСМ Производство на топлина нагласува дека мазутот, согласно техничките спецификации, мора да ги исполнува стандардите на домашната регулатива, а количините се индикативно планирани за максимален режим на работа на топланите во траење од 15 дена.

Компанијата останува фокусирана на примарното користење на природен гас, додека алтернативното гориво е дел од законските мерки за обезбедување сигурност и квалитет во снабдувањето со топлинска енергија.