Додик со итна реакција по распишувањето на потерницата од Интерпол: Муслиманите од Сараево се обидуваат да го инструментализираат судството

Претседателот на Република Српска, Милорад Додик, оцени дека се продолжува со злоупотреба на правосудството за политички цели, реагирајќи на одлуката на Судот на Босна и Херцеговина да го прифати предлогот на Обвинителството за распишување меѓународна потерница за него и за Ненад Стевандиќ.

„Муслиманите од Сараево прават сè за да го инструментализираат Обвинителството и Судот и да го интернационализираат овој случај“, изјави Додик, нагласувајќи дека оваа потерница мора да биде одобрена од седиштето на Интерпол.

Според него, оваа одлука нема да ѝ користи на бошњачката страна, туку напротив – и самиот ќе ја интернационализира ситуацијата.

„Јас ги почитувам одлуките на Народното собрание на Република Српска, каде јасно беше кажано како треба да постапувам и како претседател ќе се држам до тие ставови. За мене, Република Српска е единствено важна, додека БиХ е неуспешна и пропадната држава. Сакам да им укажам на сите Срби во Српска што ги чека ако не се по волја на муслиманите во Сараево – тие ќе го инструментализираат правосудството за да расчистат со секој српски политичар или бизнисмен“, истакна Додик.

„Знам дека ова е дел од процесот“

Тој додаде дека во Република Српска има и такви кои се радуваат на оваа ситуација, но нагласи дека тој самиот е смирен.

„Свесен сум дека ова е дел од процесот и дека на крајот ќе мора да сфатат дека се работи за груба злоупотреба, а дека Судот и Обвинителството не требало ни да постојат. Ако институциите се злоупотребуваат на ваков начин, тогаш немаат ни легитимитет. Република Српска ќе продолжи со својата борба, иако не е лесно кога механизмите на наводното правосудство се злоупотребуваат. Ова го гледам како обид на Сараево да ме принуди да одам таму и да бидам фотографиран. Ова е дел од нивниот напор да ја спречат Република Српска да делува на меѓународната сцена“, заклучи Додик.