Skip to content
Универзитетски професори, наставници, ученици и студенти ширум Србија организираа повеќечасовни протести пред Министерството за образование во Белград и низ неколку градови низ државата, изразувајќи незадоволство од назначувањето на Дејан Вук Станковиќ како нов министер за образование во новата Влада на Србија.
Протестите, организирани од иницијативата „Побунет универзитет“, ПУЛС – здружението на вработени во основните и средните училишта и други образовни здруженија, почнаа уште во раните утрински часови, објави Нова.рс.
Пред зградата на Министерството, протестантите поставија транспаренти, свиреа со пишталки и блокираа дел од сообраќајот. Симболично, во 11:52 часот, присутните одржаа 16 минути тишина во спомен на жртвите од трагичната несреќа во Нови Сад, кога пад на надстрешница усмрти неколку млади лица.
Во текот на протестот, наставниците потпишуваа петиција за прекин на дисциплинските постапки кои се водат против нив во училиштата, поради штрајковите и прекините на наставата.
Протестите не поминаа без инциденти. Во Крагуевац, за време на протестот на студентите од Факултетот за медицински науки, дошло до физички конфликт во зградата на Институтот, каде што се изведувала онлајн настава. Еден од вработените во финансиската служба на факултетот физички ги нападнал двајца студенти. На местото на настанот пристигнала и полицијата, а студентите дале изјави.
Студентски и средношколски блокади
Паралелно, студенти од повеќе факултети низ земјата спроведуваат блокади на факултетските згради. Во Нови Сад, студентите од Факултетот за спорт и физичко образование го блокираа влезот на зградата, обвинувајќи ја управата дека без основ вовела онлајн настава, иако дозволата за тоа истекла по пандемијата.
Во Ужице, студентите од Академијата на струковни студии започнаа 24-часовна блокада, додека во Валево, група средношколци пеш тргна кон Нови Сад за големиот протест најавен за 26 април.
Наставничката Тијана Спасојевиќ од Архитектонската школа во Белград изјави дека поставувањето на Станковиќ за министер е навреда за целата просветна заедница. „Изгледа дека ни е поставен министер на одмаздата, а не на образованието“, рече таа.
Професорот Дејан Павловиќ остро го критикуваше односот на државата кон наставниот кадар, потсетувајќи дека дел од просветните работници не добиле плата веќе два месеца. „Ова е војна – кога му ги труеш изворите на сопствениот народ. Наставниците откажуваат летувања, не можат да си ги платат кириите“, изјави тој.
Покрај оставка на новиот министер, демонстрантите бараат итно запирање на дисциплинските мерки, правична распределба на платите и вистински дијалог со наставниот кадар и студентите. Исто така, ја изразија загриженоста за обидите за гаснење на гласовите на младите и образовните работници преку закани и онлајн замени за квалитетна настава.
Движењата што започнаа како студентски отпор, прераснуваат во поширок фронт на образовна солидарност низ целата земја, а според организаторите – ова е само почеток.
