МФА „Илинден“ од Канада освои прво место на Меѓународниот фолклорен фестивал во Шпанија

Македонскиот фолклорен ансамбл „Илинден“ од Мисисага, Канада го освои првото место на Интернационалниот уметнички фестивал од натпреварувачки карактер во Љорет де Мар, Каталонија, Шпанија.

-Овој триумф не е само победа за ансамблот, туку и историски момент за македонската култура oд дијаспората. „Илинден“ е првото македонско фолклорно ансамбл од северноамериканскиот континент што постигнало вакво признание на интернационален натпреварувачки фестивал, во конкуренција на врвни ансамбли од Индонезија, Шпанија, Литванија, Индија, Латвија, Украина и други земји, соопштија од ансамблот.

Како што посочуваат, ансамблот на фестивалот кој се одржа на 1 мај во Шпанија, се претставил со фрагмент од сценската кореографија „Источна“, дело на доајенот Тофе Дракулески, со музика на истакнатиот Ѓорѓи Димчевски – изведба што ја плени публиката со автентичност, динамика и сценска грандиозност, добивајќи највисоки оценки од меѓународното стручно жири.

Македонски фолклорен ансамбл „Илинден“, дел од Македонската Православна Црква „Св. Илија“ – Мисисага, постои од 1984 година и е еден од најзначајните културни столбови на македонската дијаспора во Канада.

Во изминатите децении, ансамблот има настапувано низ повеќе градови во САД (Њујорк, Чикаго, Вашингтон, Акрон, Бафало, Детроит), како и во земјава.