Skip to content
Македонија повторно се соочува со огнени жаришта, но според последните податоци од Центарот за управување со кризи (ЦУК), состојбата е стабилизирана. До утрово во 7 часот биле евидентирани вкупно 28 пожари на отворено, од кои два сè уште се активни, четири се ставени под контрола, а 22 се целосно изгаснати.
Активни се пожарите кај селото Николич во општина Дојран, каде што гори нискостеблеста шума, и во Чучер Сандево, на тешко достапен терен меѓу селата Горњани и Блаце, каде се работи за шумски пожар од поголем обем.
„На терен се ангажирани сите расположливи ресурси – противпожарни единици, шумска полиција и волонтери. Ситуацијата е под внимателен надзор, особено во регионите со активни пожари“, информираат од ЦУК.
Во текот на ноќта, четири пожари се ставени под контрола, и тоа кај:
- Црешнево, Крапа и Локвица (општина Македонски Брод),
- с. Слатино (исто во Македонски Брод),
- с. Џидимирци (Велешко),
- с. Перово (Ресен), каде што гореше трска и деградирана шума.
Пожарите биле најчести во западна и југоисточна Македонија, со интервенции во региони како Струга, Штип, Куманово, Гевгелија, Кичево, Охрид, Виница и Македонски Брод. Запалени биле депонии, ниска вегетација и шумски површини.
Од ЦУК повторно апелираат до граѓаните да не палат оган на отворено, посочувајќи дека при вакви температури дури и мала искра може да предизвика сериозен пожар. Секој сомнителен чад или пламен треба веднаш да се пријави.
