Литванија ќе обучува 22.000 луѓе, меѓу кои и деца од 8 години, за управување со дронови

Литванија започнува амбициозна програма за обука за склопување и управување со дронови, во која ќе бидат вклучени над 22.000 луѓе, меѓу нив и ученици на возраст од само осум години. Целта е да се зголеми капацитетот на земјата за цивилен отпор и техничка подготвеност во услови на зголемена закана од Русија, пишува „Гардијан“.

Програма за сите возрасти

Иницијативата е заеднички проект на министерствата за одбрана и образование, а обуката ќе биде прилагодена според возраста:

• Ученици од трето и четврто одделение (8–10 години) – ќе учат едноставно склопување и пилотирање на дронови преку игри и експерименти.
• Средношколци – ќе конструираат и програмираат дронови за внатрешна употреба.
• Ученици од повисоките години – ќе дизајнираат 3Д делови и ќе склопуваат ФПВ дронови со напредни можности.

Инвестиција и инфраструктура

Владата ќе вложи 3,3 милиони евра во опрема – од ФПВ дронови за внатрешна и надворешна употреба, до системи за видео-пренос и мобилна апликација за обука.

• Во септември ќе се отворат центри за контрола на дронови во Јонава, Таураге и Кедаинијаи, а до 2028 година ќе следат уште шест во други региони.
• Обуката ќе ја спроведува Литванскиот сојуз на стрелци во соработка со Литванската агенција за неформално образование.

Безбедносен контекст

Како и соседните Естонија и Латвија, Литванија е во состојба на висока готовност од почетокот на руската инвазија на Украина. Во јули, два дрона – за кои се верува дека се руски – влетаа од Белорусија на литванска територија. Дополнително, вчера Естонија протера руски дипломат поради „мешање во внатрешните работи“, што ја зголеми перцепцијата на закана во регионот.

Поглед кон иднината

Министерката за одбрана Довиле Шакалиене изјави дека до 2028 година ќе бидат обучени 15.500 возрасни и 7.000 деца. Замениk-министерот Томас Годљаускас нагласи дека ваквите програми ја подигнуваат техничката писменост и ги подготвуваат младите за идни безбедносни предизвици.