ЦУК: Гори Македонија -19 пожари за еден ден, осум сè уште активни

На територијата на државата до 12 часот денеска регистрирани се вкупно 19 пожари на отворен простор, од кои осум се сè уште активни, а единаесет се целосно изгаснати, информира Центарот за управување со кризи (ЦУК).

Меѓу активните пожари се и оној во повеќенаменското подрачје „Јасен“ во општина Македонски Брод, во Струга кај местата „Октишка Краста“ и „Бегова Шума“, во Прилеп – село Дабница, како и кај селата Девич – Грешница во Македонски Брод. Пламен сè уште има и во село Теранци (Чешиново-Облешево), меѓу селата Рогачево и Јажинце (Јегуновце), како и во село Св. Петка (Сопиште).

Во изминатите часови изгаснати се пожарите во општините Демир Хисар, Струга, Делчево, Куманово, Старо Нагоричане, Сарај, Арачиново, Желино, Тетово и Гостивар.

Надлежните апелираат до граѓаните да бидат внимателни и да пријават секој забележан пожар, за да се спречи понатамошно ширење на огнената стихија.