Skip to content
СДСМ ќе настапи на локалните избори со кандидати „кои се почитувани во своите заедници и ќе работат чесно и одговорно“, порача претседателот на партијата Венко Филипче на прес-конференција, одговарајќи на новинарско прашање за кадровската понуда.
Тој оцени дека насоките на премиерот Христијан Мицкоски кон градоначалниците од ВМРО-ДПМНЕ резултирале со „катастрофално управување“ на дел од општините и го посочи Скопје како највидлив пример на „урбан и комунален застој“.
Филипче најави дека СДСМ ќе настапи со сегашната коалиција и со програми што комбинираат големи развојни зафати во поголемите општини и микро-решенија за секојдневните проблеми во помалите средини. Во вториот круг, најави можни разговори и со партии од албанскиот блок, „во интерес на стабилно локално управување“.
Во врска со изборните правила, лидерот на СДСМ изрази жалење што власта не обезбеди мнозинство за усогласување на Изборниот законик по одлуката на Уставниот суд со која беа укинати два члена, оставајќи нерегулирано прашања поврзани со независните листи. Како преодно решение, СДСМ поддржал намалување на прагот за потписи за кандидатури од 1% на 0,5%: „Тоа е фер и го отвора просторот за граѓански иницијативи,“ рече Филипче, додавајќи дека лично ја поддржува волјата на независните да излезат на избори.
Тој најави „позитивна и содржинска“ кампања фокусирана на локални теми, со дел од централните прашања за кои „граѓаните треба да знаат кому му ја доверуваат работата“. Во политичкиот биланс, Филипче потсети на, како што рече, неисполнети ветувања од 2024 година и на стагнација на стандардот: „Не смееме да дозволиме повторно враќање на политиката на лажни ветувања.“
„Јас давам гаранција дека нашите градоначалници ќе работат чесно – со целосна поддршка од партијата. Нудиме чесни кандидати и мерливи резултати,“ порача Филипче.