Ким Новак со „Златен лав“ за животно дело во Венеција: триумфално враќање на 92 години

Легендарната холивудска актерка Ким Новак (92) доби „Златен лав“ за животно дело на 82. Меѓународен филмски фестивал во Венеција, во свое прво големо јавно појавување по речиси една деценија. Признанието ѝ беше врачено синоќа со долги овации, од страна на режисерот Гијермо дел Торо, чиј „Франкенштајн“ имаше премиера на фестивалот.

„Длабоко сум трогната од ова признание. Да бидам препознаена за моето животно дело во оваа возраст е остварување на сон. Секој момент во Венеција ќе остане во моето срце“, изјави Новак по свеченоста.

Публиката во Венеција ја виде и премиерата на биографскиот документарец „Kim Novak’s Vertigo“, долгогодишен проект на продуцентката и менаџерка Су Камерон. „Сакав Ким повторно да ја доживее славата што некогаш ја имаше. Филмот ја прикажува вистинската Ким, со сите радости и трагедии од детството“, рече Камерон.

Ким Новак останува симбол на класичниот Холивуд преку улогата во култниот психолошки трилер „Vertigo“ (1958) на Алфред Хичкок – филм што денес важи за едно од најзначајните дела во историјата на киното. Во 1980-тите се повлече од актерството и се пресели во Орегон. Во интервју од 2021 година, Новак објасни дека го напуштила Холивуд „за да преживее“, оти чувствувала дека го губи сопствениот идентитет.

„Златниот лав“ во Венеција е признание не само за нејзината филмска кариера, туку и за личната автентичност и доследност – вредности што ја обележаа Новак низ повеќе од шест децении присутност во културата и колективната меморија на филмот.