Skip to content
Министерот за одбрана на Босна и Херцеговина, Зукан Хелез, побара од Државното обвинителство да ја забрза и до крај да ја расчисти истрагата за постоењето на паравоени кампови што, според досегашните сознанија, биле формирани на територијата на БиХ од лица поврзани со Русија.
Повикот, како што го пренесува сараевско „Ослобоѓење“, доаѓа во момент кога во Молдавија се водат слични процеси. Тамошните власти открија обиди за организирање насилни инциденти за време на претседателската кампања и референдумот за европска интеграција, при што се појавија докази дека дел од осомничените поминале обука токму во БиХ.
Сведочења од Молдавија водат кон БиХ
Пред судот во Кишињев е во тек процес против молдавскиот државјанин Владимир Харцевников. Тој сведочел дека преку Србија пристигнал во БиХ, каде што поминал тактички обуки: од склопување и програмирање дронови до изработка на молотови коктели.
„Некои момци ме пречекаа во Србија… потоа ме одведоа во автобус за БиХ… таму ме сместија и следниот ден заминавме во шаторски камп“, изјавил Харцевников, опишувајќи дека целата обука ја водел руски инструктор по име Виктор.
Харцевников, веќе осудуван за убиство, беше уапсен заедно со Максим Рошка, Алиона Гоц и Лудмила Костенко на молдавско-румунската граница во октомври 2024 година. Сите, освен Рошка, се обвинети за подготвување активности за дестабилизација на државата.
Камп во околината на Бања Лука
Возачот Рошка на суд сведочел дека видел камп „во околината на Бања Лука“, во кој биле присутни околу 12 лица. Според него, обуката имала за цел да подготви групи кои би реагирале во „критичен момент“ за да спречат сценарио „како во Украина“.
Обвинителството на БиХ потврди дека побарало податоци од молдавските власти, но дека сè уште чекаат одговор.
Хелез: „Некој морал да им овозможи инфраструктура“
Министерот Хелез смета дека истрагата мора да се спроведе до крај.
„Треба да се утврди кој бил домаќин на тие луѓе. Некој им овозможил инфраструктура и логистика. Не може да дојде некој од друга држава и сам да отвори камп, без поддршка од домашни структури“, изјави тој.
Хелез додаде дека во вакви случаи институциите мораат да реагираат побрзо.
„Треба да бидеме загрижени кога нашите агенции доцнат, а кога ваквите информации излегуваат во јавност, изложени сте на разни напади“, рече тој.
Постари предупредувања и нови потврди
Во февруари 2025 година, БиХ го испорача на Полска рускиот државјанин Александар Безруковни, обвинет дека координирал напади врз Полска, САД, Германија и други западни земји.
Хелез уште во 2023 година предупредуваше на можноста за постоење руски кампови во Република Српска. Тогаш руската амбасада и властите во Бања Лука ги отфрлија тие тврдења како измислени.
Сега, министерот истакнува дека истрагите во Молдавија го потврдуваат она на што долго време предупредувал.
Извор: Index.hr
