Економисти: Секоја четврта личност во светот нема редовен пристап до храна

Стотици светски економисти, меѓу кои и поранешната американска министерка за финансии Џенет Јелен, денеска повикаа да се формира независен меѓународен панел за следење на нееднаквоста во приходите и богатството. Апелот е објавен во отворено писмо во пресрет на самитот на Г20, кој следниот викенд ќе се одржи во Јужноафриканската Република, каде се очекува да биде претставен извештај за глобалната нееднаквост под водство на нобеловецот Џозеф Стиглиц, пренесува AP.

Кризата на нееднаквост станува глобална закана

Во извештајот, објавен претходно овој месец, се наведува дека светот, покрај климатската криза, се соочува и со криза на нееднаквост која придонесува за политичка нестабилност, конфликти и „намалена доверба во демократијата“.

Од 2000 до 2024 година, најбогатиот 1 процент од светското население го поседува 41 процент од целото новосоздадено богатство. Истовремено, секоја четврта личност – околу 2,3 милијарди луѓе – се соочува со умерена или тешка прехранбена несигурност, што значи дека редовно прескокнува оброци. Тој број од 2019 година е зголемен за 335 милиони.

Повик за нов меѓународен панел за нееднаквост

Извештајот препорачува создавање на нов Меѓународен панел за нееднаквост, кој би им давал совети на владите за справување со проблемот, по примерот на Меѓувладиниот панел за климатски промени (IPCC).

„Недемократска концентрација на моќ“

Економисти и експерти за нееднаквост, меѓу кои и други добитници на Нобелова награда, како и поранешни високи претставници на Светската банка и ММФ, во писмото изразуваат сериозна загриженост:

„Загрижени сме дека екстремната концентрација на богатство прераснува во недемократска концентрација на моќ, што го уништува довербата во нашите општества и ја продлабочува политичката поларизација“, стои во писмото.

Јужноафриканската Република во фокусот

Јужноафриканската Република, домаќин на самитот на Г20 на 22 и 23 ноември, сака глобалната нееднаквост да стане една од главните теми. Иронично, според Светската банка, токму Јужноафриканската Република е рангирана како држава со најголема нееднаквост во светот.

Извор: Index.hr