Skip to content
Потрагата по 32-годишната инфлуенсерка Стефани Пипар од Грац заврши со најцрно сценарио. Жената, која неколку дена се водеше како исчезната, е пронајдена мртва во Словенија, во шумска област во близина на Марибор. До телото ги одвел истражителите нејзиниот поранешен партнер, кој признал дека ја убил, го сокрил телото во куфер и го закопал во шума.
Семејството и колегите од работа го пријавиле исчезнувањето на Стефани минатата недела. Не можеле да ја добијат на телефон, а таа не се појавила на договорена фотосесија во Грац. Претходната ноќ ја поминала на божиќна забава, по што ѝ се губи секоја трага. Колега фотограф отишол до нејзиниот стан за да провери дали е сè во ред, но таму го затекнал нејзиното поранешно момче, маж по име Петар, што дополнително ги засилило сомнежите.
Истражителите брзо ја насочиле вниманието кон 31-годишниот Словенец, кој живеел и работел во Грац и бил во претходна врска со Стефани. Набргу по пријавувањето на исчезнувањето, словенечката полиција го уапсила во понеделник вечерта. Бил забележан во близина на запален автомобил покрај казино јужно од граничниот премин Шпилфелд. Постои оправдан сомнеж дека со палењето на возилото се обидувал да уништи докази поврзани со злосторството.
По апсењето во Словенија, осомничениот бил екстрадиран на австриските власти. За време на неколкучасовното испрашување го прекинал молкот и признал дека ја задавил Стефани, го ставил нејзиното тело во куфер и потоа го закопал во шумски предел на словенечка територија, во околината на Марибор. Полицијата, придружена од осомничениот, излегла на терен и го пронашла телото на убиената инфлуенсерка.
Во рамки на истрагата биле уапсени и братот и очувот на осомничениот. Тие се приведени под сомнение дека можеби помогнале во прикривање на траги и докази. Обвинителството испитува дали имале непосредна улога во сокривањето на телото или во уништување материјални докази поврзани со случајот.
Случајот ја потресе австриската јавност, не само поради бруталниот начин на кој е извршено убиството, туку и поради фактот што жртвата била препознатливо лице на социјалните мрежи. Стефани Пипар имала значителен број следбеници и кариера како инфлуенсерка и модел, а нејзиното исчезнување првично предизвика лавина апели за помош и поделени објави на интернет. Трагичниот епилог само ја отвори темата за безбедноста на жените, насилството во партнерските односи и колку брзо интимното насилство може да премине во тешко кривично дело.
Истрагата продолжува, а австриските и словенечките органи соработуваат за целосно расветлување на случајот. Против поранешното момче ќе биде поднесено обвинение за тешко убиство, а ќе се утврдува и евентуалната кривична одговорност на неговите блиски кои се сомничат за прикривање траги.
