Skip to content
Шпанија го забележа своето најжешко лето досега во 2025 година, со три силни топлотни бранови.
Шпанија ќе воспостави национална мрежа на климатски засолништа во јавни згради, која ќе им обезбеди на граѓаните засолниште од екстремна топлина почнувајќи од следното лето, објави премиерот Педро Санчез.
„Катастрофалните суши и топлотни бранови повеќе не се ретки. Во некои лета не се соочуваме со посебни топлотни бранови, туку со еден долг топлотен бран што трае од јуни до август. Ова е сега новата реалност“, рече шпанскиот премиер Педро Санчез.
Шпанија го забележа своето најжешко лето досега во 2025 година, со три силни топлотни бранови. За време на еден од нив, кој траеше 16 дена во август, според податоците на Државната метеоролошка агенција (AEMET), температурите надминаа 45 степени Целзиусови.
Како дел од националната мрежа на климатски засолништа, ладени простори ќе бидат достапни за сите граѓани, нагласи Санчез. Засолништата ќе бидат финансирани од државата, првенствено во области „каде што потребите се најголеми и каде што топлината најмногу го погодува населението“.
Оваа иницијатива се темели на постојните мрежи што веќе ги воспоставиле некои автономни заедници, вклучувајќи ги Каталонија, Баскија и Мурсија.
Во Шпанија веќе постојак климатски засолништа
Во Барселона, главниот град на Каталонија, веќе има околу 400 климатски засолништа во објекти како што се библиотеки, музеи, спортски центри и трговски центри. Овие климатизирани простори, кои обично нудат места за седење и бесплатна вода, се наменети да обезбедат засолниште за граѓаните од топлината, особено за лицата со здравствени проблеми, постарите лица, бебињата и оние со ограничени финансиски средства.
Санчез, исто така, објави дека владата ќе финансира планови за заштита од поплави во помалите градови, додека дополнителни 20 милиони евра ќе бидат издвоени за планови за спречување на пожари во руралните средини, како дел од пактот за климатски промени на земјата.
Предложениот пакет мерки сè уште не е доставен до Конгресот на пратениците, долниот дом на шпанскиот парламент. Санчез ги повика другите политички актери да се вклучат во развојот на пактот, нагласувајќи дека тој „не е изборно оружје, туку штит за Шпанија“.
Според Меѓувладиниот панел на ОН за климатски промени, топлотните бранови стануваат сè почести и поинтензивни како резултат на климатските промени предизвикани од човекот.
Проценките од Министерството за здравство покажуваат дека ова лето во Шпанија се регистрирани повеќе од 3.800 смртни случаи поврзани со топлина, што е за 88 проценти повеќе отколку во 2024 година.
Во текот на 2025 година, Шпанија беше погодена од исклучително тешка сезона на шумски пожари, во која беа изгорени повеќе од 400.000 хектари земја.