Кои се фаворитите за челната позиција во американската централна банка (ФЕД)?

Потрагата по нов претседател на американската централна банка влегува во завршна фаза. Американскиот претседател Доналд Трамп се очекува во наредните недели да го објави својот избор за наследник на Џером Пауел, чиј мандат како претседател на Федерални резерви истекува во мај.

Идниот шеф на ФЕД ќе ја преземе функцијата во чувствителен момент: институцијата е под политички притисок, внатрешно поделена околу каматната политика, а нејзиниот кредибилитет е под лупа поради отворените повици на Трамп за пониски каматни стапки. Изборот на претседателот ќе мора да помине и низ Сенатот, каде ќе следи процес на потврда.

Во јавноста и на финансиските пазари се издвојуваат три имиња како главни фаворити.

Кевин Хасет – лојалист на Трамп

Еден од најчесто споменуваните кандидати е Кевин Хасет, долгогодишен конзервативен економист и близок советник на Трамп. Тој беше претседател на Советот на економски советници во првиот мандат на Трамп, а сега ја води Националната економска комисија.

Иако неговите шанси благо ослабеа од почетокот на декември, Волстрит сè уште го смета за најверојатен избор. Хасет е познат како силен бранител на економските политики на Трамп, но токму неговата блискост со Белата куќа отвора сомнежи дали би можел независно да ја води централната банка.

Аналитичарите предупредуваат дека тој би можел тешко да обезбеди консензус меѓу другите членови на ФЕД за значително намалување на каматните стапки, особено поради тековните инфлациски ризици. Самиот Хасет изјави дека независноста на ФЕД е „исклучително важна“, но истовремено нагласи дека има простор за пониски камати.

Кевин Ворш – остар критичар на ФЕД

Вториот „Кевин“ во трката е Кевин Ворш, поранешен гувернер на ФЕД (2006–2011) и економист поврзан со конзервативниот Институт Хувер. Тој веќе беше сериозен кандидат и во првиот мандат на Трамп.

Ворш е познат како жесток критичар на сегашната политика на ФЕД, вклучително и начинот на кој централната банка ги користи податоците и управува со својот биланс. Иако во минатото важеше за „јастреб“ наклонет кон повисоки камати, во последно време се позиционира како поддржувач на нивно намалување, тврдејќи дека тоа може да се постигне преку намалување на билансот на ФЕД.

Дополнителна тежина на неговата кандидатура ѝ дава и неговата семејна поврзаност со кругови блиски до Трамп, неговиот таст е милијардерот Роналд Лаудер, долгогодишен донатор и сојузник на поранешниот претседател.

Кристофер Волер – кандидат „одвнатре“

Третото име што сè почесто се споменува е Кристофер Волер, актуелен гувернер на ФЕД, кој неодамна имал интервју со Трамп. Волер беше номиниран во 2020 година токму од Трамп и во последно време јавно истакнува дека има простор за дополнително намалување на каматните стапки.

За разлика од Хасет и Ворш, Волер нема силни лични врски со Белата куќа, нешто што дел од финансиските пазари го гледаат како предност. Аналитичарите сметаат дека токму таа дистанца може да му помогне да го зачува кредибилитетот и независноста на институцијата.

Иако двата „Кевини“ и натаму се сметаат за фаворити, Волер се наметнува како „попрагматичен избор“, според дел од инвестициските менаџери. Во игра се споменуваат и други имиња, како извршен директор од BlackRock или дури и актуелниот министер за финансии, но засега тие се во втор план.

Кој и да биде избран, неговиот вистински судија ќе биде Волстрит и довербата на пазарите дека ФЕД може да остане независен во време на силен политички притисок и економска неизвесност.