„Самоопределување“ на Курти има 56 места во косовскиот парламент

Откако заврши пребројувањето на гласовите, речиси една недела по предвремените парламентарни избори во Косово, стана јасно кои ќе бидат 120-те нови пратеници.

Партијата „Самоопределување“ на Албин Курти ќе има 56 места, по неа следуваат Демократската партија на Косово со 23, Демократскиот сојуз на Косово со 15, Српската листа со 9 и Алијансата за иднината на Косово со 6 места.

Централната изборна комисија (ЦИК) го заврши пребројувањето на преференцијалните гласови за кандидатите за парламентот во саботата. Околу 45% од речиси 2 милиони гласачи со право на глас учествуваа на изборите.

Самиот Курти постави нов рекорд, станувајќи политичар со најмногу гласови (355.248) во историјата на Косово. Тој го подобри сопствениот рекорд од редовните избори на 9 февруари, кога беше поддржан од 337.791 гласачи. Претходниот рекорд и припаѓаше на претседателката Вјоса Османи со 300.756 гласови.