Skip to content
Со сослушување сведоци предложени од Јавното обвинителство денеска во судницата во „Идризово“ треба да продолжи судењето за пожарот во дискотеката „Пулс“ во Кочани, во која загинаа 63 лица, а над 200 беа повредени.
На претходното рочиште пред Судот беа сослушани двајца сведоци. Сведокот Трајче Димишковски, кој од 2023 до август 2025 година бил дел од агенцијата за обезбедување „Рубикон“ во своето сведочење опиша како се одвивала комуникацијата меѓу вработените, кој бил одговорен за распоредот на луѓето, како и какви насоки давал професорот Александар Нацев при поголеми настани и предавања за законските обврски на обезбедувачите.
Претходно сведочеше инспектор на ДЗС од поддрачно одделение во Виница, кој кажа дека по пожарот во клубот „Пулс“ во Кочани, увидната екипа на Дирекцијата за заштита и спасување утврдила сериозни пропусти – недостиг на противпожарни апарати, празен хидрант, и заклучена помошна врата. Инспекторот сведочеше дека Општина Кочани повеќе од една деценија немала инспектор за заштита и спасување, а за надзор во друга општина е потребен писмен налог од раководството.
Поради големиот број на обвинети и недостигот на капацитети во судовите во источниот дел на државата, главниот судски процес се одвива во специјалната судница во затворот Идризово. Вкупно 58 лица се соочуваат со обвиненија поделени во четири одделни предмети.
Првиот и најобемниот предмет опфаќа 35 обвинети, меѓу кои сопственикот Дејан Јованов, поранешни министри за економија, градоначалници на Кочани и инспектори од Дирекцијата за заштита и спасување. Одбраната, предводена од адвокати како Петре Шилегов, ја оспорува правната квалификација „тешки дела против општата сигурност“, тврдејќи дека не постои директен каузалитет меѓу административните пропусти при издавање лиценци пред десет години и самиот пожар во 2025 година.
Досега се одржани 15 рочишта на кои сведочеа преживеани, вработени и инспектори, додека обвинетите се изјаснија за невини.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Со денешното рочиште продолжува доказната постапка со изведување сведоци на предлог на Обвинителството – кое го застапува тим од 15 јавни обвинители.