Блумберг Адриа: Македонија меѓу земјите кои ќе бидат најмногу погодени од војната

Македонија се вбројува меѓу земјите што би можеле да претрпат најсилни економски последици од актуелната војна на Блискиот Исток, предупредува Европската банка за обнова и развој (ЕБОР), посочувајќи дека геополитичките шокови сè побрзо и подлабоко се прелеваат врз малите и отворени економии, пишува денеска Блумберг Адриа.

Според анализата, клучниот канал на пренос на кризата е енергетскиот сектор, каде што нарушувањата во снабдувањето и растот на цените на нафтата и гасот директно влијаат врз инфлацијата и трошоците за живот. Паралелно, се зголемува притисокот врз синџирите на снабдување, што дополнително ја отежнува економската активност и ја зголемува неизвесноста кај компаниите.

ЕБОР укажува дека ваквите шокови не се ограничуваат само на енергијата, туку се пренесуваат и преку финансиските услови, со поскапо финансирање и поголема претпазливост кај инвеститорите. Тоа особено ги погодува економиите како македонската, кои се силно зависни од увоз на енергенси и од надворешна трговија.

Во ваков контекст, ризиците за забавување на економскиот раст се зголемуваат, додека инфлаторните притисоци би можеле повторно да се засилат, особено доколку конфликтот ескалира и предизвика дополнителни ценовни шокови на глобалните пазари. Анализата сугерира дека идниот економски тек во голема мера ќе зависи од развојот на кризата и од нејзиното влијание врз енергетските пазари и глобалната трговија.

Иако директната изложеност на Македонија кон регионот на Блискиот Исток е ограничена, индиректните ефекти преку цените, трговијата и финансиските текови се доволно силни за земјата да се најде меѓу најранливите во регионот, заклучува ЕБОР.