Skip to content
Празен акумулатор за многу возачи значи едно исто сценарио: паника, отворање хауба и брза потрага по некој што има кабли. Но токму во тие неколку минути најчесто се прават и најскапите грешки. Неправилното палење на автомобил „на клеми“ не носи само ризик дека возилото нема да запали, туку може да предизвика искра, краток спој, оштетување на електрониката, а во некои случаи и пожар.
Основното правило е редоследот. Прво се поврзува црвениот кабел на позитивниот пол на автомобилот што не пали, а потоа другиот крај од истиот кабел на позитивниот пол на возилото што помага. Дури потоа доаѓа црниот кабел, кој најпрво се става на негативниот пол на исправниот акумулатор, а другиот негов крај не оди на минусот од испразнетиот акумулатор, туку на точка за заземјување или на чист метален дел од моторот или шасијата, подалеку од самиот акумулатор. Токму тука многумина грешат.
Причината не е формалност, туку безбедност. Кај празен или оштетен акумулатор може да има ослободување гасови, а последната искра што настанува при спојување на каблите не треба да се случи веднаш до батеријата. Затоа црниот кабел се носи на метална точка на моторот, а не на негативниот пол од автомобилот што не пали. Така се намалува ризикот од варничење и запалување.
Уште една честа грешка е нагаѓањето. Ако не сте сигурни кој пол е плус, а кој минус, не смее да се продолжи „по чувство“. Кај поновите возила, погрешно споени кабли можат да направат многу поскапа штета од обичен празен акумулатор, затоа што денешните автомобили имаат чувствителни електронски системи, сензори и контролни единици. Една грешна врска може да заврши со сервис наместо со брзо палење.
Важен е и моментот пред да се проба палење. Каблите треба да бидат квалитетни и доволно силни, а автомобилите треба да стојат без да се допираат. Ако процедурата се прави на пат, прво треба да се обезбеди местото со триаголник и рефлектирачки елек. Кога сè е поврзано, вообичаената препорака е возилото што помага кратко да поработи, па потоа да се проба стартување на автомобилот со празен акумулатор. Ако не запали по неколку обиди, не треба бескрајно да се форсира, туку да се побара стручна помош.
И одврзувањето има свој ред. Кога автомобилот ќе запали, каблите се вадат по обратен редослед од поврзувањето. Тоа значи прво се трга црниот кабел од автомобилот што бил во дефект, па црниот од донорското возило, а потоа црвениот. Откако ќе запали, автомобилот не треба веднаш да се гаси, туку да се вози одредено време за алтернаторот да го надополни акумулаторот. Ако и потоа има проблем, причината можеби не е само батеријата.
Посебна претпазливост е потребна кај електрични автомобили и plug-in хибриди. И тие имаат 12-волтна батерија, но производителите често не препорачуваат да служат како донор за друго возило. Кај нив дополнително постојат и високонапонски компоненти, па секое импровизирање може да биде опасно. Затоа и тука првото правило е исто: ако нема сигурност, нема експерименти.